महापालिकेच्यावतीने थकबाकीदारांना जप्तीपूर्वीच्या नोटीसा बरोबरच वॉरंट नोटीसांचे वाटप सुरू
पनवेल,दि.०4: पनवेल महापालिकेच्या कर संकलन व कर आकारणी विभागाच्या वतीने थकबाकीदारांच्या मालमत्ता जप्ती पूर्व नोटीसांबरोबर वॉरंट नोटीसा देण्यात सुरूवात केली आहे. आतापर्यंत पनवेल महानगरपालिका कार्यक्षेत्रातील विविध नोडमध्ये सुमारे ३००हून अधिक जप्तीपूर्वीच्या नोटीसा व 8 वॉरंट नोटीसांचे वाटप थकबाकीदार मालमत्ता धारकांना दिल्याने थकबाकीदारांचे धाबे दणाणले आहेत. आयुक्त श्री.गणेश देशमुख यांच्या सुचनेनूसार पुढील महिन्यात जप्ती मोहीम अधिक तीव्र करण्याचा इशारा महापालिकेच्या वतीने देण्यात आला आहे.
आजवर महापालिकेने सातत्याने नागरिकांना सवलती देऊन मालमत्ता कर भरण्याबाबत आवाहन केले आहे. परंतू आता महापालिकेने थकबाकीदारांच्या विरोधात कठोर पावले उचलण्यास सरुवात केली आहे. ज्या थकबाकीदारांना जप्ती नोटीसा दिल्या होत्या , यांना आता वॉरंट नोटीसा देण्याचे काम पालिकेने युध्दपातळीवर सुरू केले आहे. याचा थकबाकीदार यांनी गांभीर्याने विचार करणे आवश्यक आहे.
पनवेल महापालिका क्षेत्रात 3लाख 50 हजार निवासी, बिगर निवासी, व्यावसायिक, औद्योगिक आदी नोंदणीकृत मालमत्ता आहेत. या मालमत्ता धारकांकडून कर वसुलीसाठी महापालिकेचे विविध झोन तयार केले आहेत. तसेच ऑनलाईन आणि विविध ॲपच्या माध्यमातून कर भरण्याची सुविधा उपलब्ध करून देण्यात आली आहे. २०२३-२४ या आर्थिक वर्षात आत्तापर्यंत २६८ कोटी मालमत्ता कर जमा झाला आहे. नागरिकांना मालमत्ता कर भरण्यासाठी महापालिकेत न येता ऑनलाईन पध्दतीने भरता यावा यासाठी महापालिकेने 'सिटीझन प्रॉपर्टी टॅक्स पेमेंट गाईड ' तयार केले आहे.
जप्ती पथकाच्या कारवाईमध्ये आज खारघर येथील भावना होंडा यांच्यावरती अटकावणीची कारवाई करण्यात आली. याचबरोबर सात मालमत्ता थकबाकीदारांना वॉरंट नोटीस बजावण्यात आल्या.बेलेझा हॉल खांदा कॉलनी, आशा मल्टि हॉस्पीटल , नवीन पनवेल मधील रिध्दी सिध्दी रेसिडन्सी महाराजा बँक्वेट हॉल,फिनीक्स हॉटेल यांना नोटीसा देण्यात आल्या. कोमल इलेक्ट्रिक दुकान पनवेल, कळंबोलीमध्ये स्टिल मार्केट,तळोजामधील विविध थकबाकीदारांना नोटीसा देण्यात आल्या.
मालमत्ता कर न भरल्यास त्याच्या शास्तीमध्ये प्रतिमहा २ टक्क्यांची वाढ होत असल्याने नागरिकांनी आपला मालमत्ता कर भरावा असे आवाहन सातत्याने रिक्षामधून लाऊड स्पीकरच्या माध्यमातून चारही प्रभागांमध्ये केले जात आहे. या आवाहनाला नागरिकांचा चांगला प्रतिसाद दिसून येत आहे. महापालिकने मालमत्ता कर ऑनलाईन भरण्यासाठी ‘PMC TAX APP’ मोबाईल ॲप विकसित केले आहे. तसेचwww. panvelmc.org या वेबसाईटवरती जाऊनही आपला मालमत्ता कर नागरिकांना भरता येणार आहे. मालमत्ताधारकांना काही शंका असल्यास 1800-5320-340 या टोल फ्री क्रमांवरती संपर्क साधावा असे आवाहन महापालिकेच्यावतीने करण्यात आले आहे.
चौकट
के एल ई कॉलेज , कळंबोली प्लॉट नं. 29 सेक्टर यांनी आज 45 लाख रुपयाचा चेक महानगरपालिकेस सुपूर्त केला. त्यांचे " महानगर पालिकेच्या वतीने आभार मानण्यात आले. याचबरोबर विबग्योर शाळेने दहा लाखाचा मालमत्ता कर भरला त्यांचेही पालिकेच्यावतीने आभार मानण्यात आले.