ग्रीन हाऊस व फॅब्रिकेशनसाठी लागणारे लाखो रुपये किंमतीचे पाईप चोरणाऱ्या आणखी दोन आरोपींना पनवेल तालुका पोलिसांनी केले गजाआड

ग्रीन हाऊस व फॅब्रिकेशनसाठी लागणारे लाखो रुपये किंमतीचे पाईप चोरणाऱ्या आणखी दोन आरोपींना पनवेल तालुका पोलिसांनी केले गजाआड


पनवेल दि.१६(संजय कदम): फॅब्रिकेशनसाठी लागणारे लाखो रुपये किंमतीचे पाईप चोरणाऱ्या त्रिकुटाला पनवेल तालुका पोलिसांनी अगोदरच गजाआड केले असताना यातील आणखी दोन आरोपींना कळंबोली येथून पोलिसांनी ताब्यात घेतले आहे. 

तालुक्यातील चिखले गावाच्या हद्दीत असलेल्या इक्रा स्टील अँड ट्यूब्स प्रा. लि. कंपनीच्या गोडाऊन मधून जानेवारी २०२३ ते आजपर्यंत अज्ञात आरोपींनी जवळपास २६ लाख ३७ हजार रुपये किंमतीचे ग्रीन हाऊस व फॅब्रिकेशनसाठी वापरण्यात येणारे अठ्ठावीस टन वजनाचे जी. आय. व एम. एस. वेगवेगळ्या आकाराचे व लांबीचे पाईप चोरीस गेल्याने याबाबतची तक्रार पनवेल तालुका पोलीस ठाण्यात करण्यात येताच वपोनि अनिल पाटील व पोनि (गुन्हे) जगदीश शेलकर यांच्या मार्गदर्शनाखाली गुन्हे प्रकटीकरण कक्षाचे सहाय्यक पोलीस निरीक्षक संजय गळवे, पोलीस हवालदार महेश धुमाळ, पोलीस हवालदार सुनील कुदळे, पोलीस हवालदार विजय देवरे व पोलीस शिपाई आकाश भगत आदींच्या पथकाने तांत्रिक तपास व गुप्त बातमीदाराच्या माहितीच्या आधारे येथील गोडाऊनचे सुपरवायजर जयकुमार तिवारी ( वय ४७) याने त्याचे सहकारी मुकेश पटेल (वय २२), लालाराम पटेल (वय २३) व अजून दोन आरोपी यांनी संगनमताने हा गुन्हा केल्याचे निष्पन्न केल्याने यातील तीन आरोपींना गुन्ह्यात वापरलेल्या पिकअप टेम्पोसह चोरलेला माल असा मिळून १८ लाख १४ हजार ३४० रुपये किंमतीचा मुद्देमाल हस्तगत केला होता. या गुन्ह्यातील दोन फरार आरोपींचा शोध पनवेल तालुका पोलीस करीत असताना सदर आरोपी मेगराज रुपाजी पटेल (वय ३१), केविलाल रुपाजी पटेल (वय ३३) दोघेही राहणार राजस्थान यांना कळंबोली परिसरात असलेल्या भंगाराच्या दुकानातून ताब्यात घेण्यात आले आहे. यांच्या अटकेमुळे चोरीस गेलेला अजून काही मुद्देमाल हस्तगत होण्याची शक्यता पोलिसांनी वर्तवली आहे.