नागरिकांच्या मागास प्रवर्गातील आरक्षणासाठी गठित केलेल्या समर्पित आयोगाचा उद्या कोंकण भवनमध्ये दौरा
अलिबाग, दि.24 (जिमाका) : नागरिकांच्या मागास प्रवर्गास आरक्षण देण्यासंदर्भात नागरिकांची मते जाणून घेण्यासाठी समर्पित आयोगाने कार्यक्रम जाहीर केला आहे. त्यानुसार हा आयोग उद्या बुधवार, दि. २५ मे २०२२ रोजी कोकण विभागीय कार्यालयात दु. २.३० ते ४.३० या वेळेत भेट देणार आहे. यावेळी नागरिकांना निवेदने देता येतील.
राज्यातील जिल्हा परिषद, पंचायत समिती, ग्रामपंचायत आणि महानगरपालिका, नगरपालिका आणि नगरपंचायती या स्थानिक स्वराज्य संस्थांमध्ये इतर मागास वर्ग (ओबीसी) , व्हीजे एनटींना आरक्षण देण्यासाठी सर्वोच्च न्यायालयाने दिलेल्या निर्देशाप्रमाणे महाराष्ट्र शासनाने समर्पित आयोग गठित केला आहे. त्यानुसार राज्यातील ग्रामीण आणि शहरी भागातील स्थानिक स्वराज्य संस्थांमधील नागरिकांच्या मागास प्रवर्गातील आरक्षणासाठी जनतेची मते जाणून घेण्यासाठी आणि या क्षेत्रात काम करणाऱ्या विविध सामाजिक संघटना यांची निवेदने स्वीकारण्यासाठी हा समर्पित आयोग विभागनिहाय भेटी देत आहे.
त्यानुसार, कोंकण विभागात उद्या दि. २५ मे रोजी आयोगाची भेट होणार आहे. कोंकण भवन येथील विभागीय आयुक्त कार्यालयात दु. २.३० ते ४.३० या वेळेत नागरिकांना आयोगाची भेट घेता येईल.
