समाजप्रिय नेतृत्व आमदार प्रशांत ठाकूर यांचा वाढदिवस समाजोपयोगी उपक्रमांनी साजरा; राज्यभरातून शुभेच्छांचा वर्षाव; मुख्यमंत्री, उपमुख्यमंत्री, सभापती, प्रदेशाध्यक्ष यांच्यासह अनेक मान्यवरांकडून शुभेच्छा
पनवेल (हरेश साठे) समाजहिताची भूमिका समर्थपणे निभावणारे आणि कार्यसम्राट म्हणून ओळखले जाणारे समाजप्रिय नेतृत्व आमदार प्रशांत ठाकूर यांचा वाढदिवस यंदाही सामाजिक बांधिलकी जपत विविध उपक्रमांनी मोठ्या उत्साहात साजरा करण्यात आला. या विशेष दिवशी आमदार प्रशांत ठाकूर यांनी वडील लोकनेते रामशेठ ठाकूर आणि आई शकुंतला ठाकूर यांचे आशिर्वाद घेतले. त्यानंतर पनवेलमधील मार्केट यार्ड येथे त्यांना शुभेच्छा देण्यासाठी हजारो कार्यकर्ते, पदाधिकारी आणि नागरिकांनी गर्दी केली.
सामाजिक भान जपणारा वाढदिवस
राज्याचे लाडके मुख्यमंत्री देवेंद्र फडणवीस यांच्या प्रेरणेतून आमदार प्रशांत ठाकूर यांनी आपल्या वाढदिवसाचे औचित्य साधून एक सामाजिक उत्सव घडवून आणला. भव्य जाहिराती, होर्डिंग-बॅनर यावर खर्च करण्याऐवजी त्यांनी कार्यकर्त्यांना सामाजिक उपक्रम राबवण्याचे आवाहन केले. या आवाहनाला प्रतिसाद देत ठिकठिकाणी आरोग्य शिबिर, रोजगार मेळावे, खेळ स्पर्धा, तसेच शालेय चित्रकला स्पर्धा आयोजित करण्यात आल्या. त्यामुळे वाढदिवस साजरा होण्याच्या पारंपरिक चौकटीपलीकडे जाऊन हा दिवस एक सामाजिक योगदानाचा उत्सव ठरला. जनतेच्या प्रश्नांशी जोडलेपण, समाजोपयोगी दृष्टिकोन आणि विधायक उपक्रमांची निवड हे आमदार प्रशांत ठाकूर यांच्या नेतृत्वाचे खास वैशिष्ट्य ठरते. त्यांच्या या आगळ्यावेगळ्या वाढदिवसाने जनतेच्या मनात अधिक विश्वास निर्माण केला आहे.
चौकट-
प्रिय प्रशांत जी,
वाढदिवसानिमित्त आपले मनःपूर्वक अभिष्टचिंतन !
पनवेल विधानसभा मतदार संघाचे प्रतिनिधीत्व करत असताना आपण दाखवलेला विकासात्मक दृष्टीकोन, समाजाभिमुख उपक्रम आणि लोकसहभागाला दिलेले प्राधान्य महत्त्वपूर्ण आहे. आपल्या सातत्यपूर्ण प्रयत्नांमुळे मतदारसंघाचा चेहरा बदलताना दिसत आहे, पनवेल परिसरात शहरी तसेच ग्रामीण विकासाला नवे परिमाण मिळताना दिसत आहे. सोबतच शहराचा विकास झपाट्याने होत असताना पर्यावरणाचा समतोल राखण्यासाठी वृक्षारोपणासारख्या मोहिमेच्या माध्यमातून आपण घेतलेला पुढाकारही प्रशंसनीय आहे. सर्वसामान्यांचे विविध प्रश्न सोडविण्यासाठीची आपली तळमळ आणि त्यासाठी आपण करत असलेला पाठपुरावा जनतेशी असलेली निष्ठा दर्शवणारा आहे. लोकप्रतिनिधींची दिनचर्या अत्यंत धावपळीची असते. मतदारसंघांची काळजी वाहत असताना आपण आपल्या आरोग्याचीही काळजी घ्याल, अशी आशा आहे. आपणास निरामयी दिर्घायुष्य लाभो व आपल्या सर्व मनोकामना पूर्ण होवो या सदिच्छेसह आपणास पुनःश्च वाढदिवसाच्या खूप खूप शुभेच्छा.!- माननीय मुख्यमंत्री देवेंद्र फडणवीस, महाराष्ट्र राज्य
चौकट-
नमस्कार, आपणांस वाढदिवसाच्या हार्दिक शुभेच्छा... एक कार्यकुशल आणि विकासाभिमुख लोकप्रतिनिधी म्हणून आपण पनवेल विधानसभा मतदारसंघ आणि रायगड जिल्ह्याच्या विकासासाठी उत्तम योगदान देत आहात. हे कार्य अशाच उत्तम प्रकारे यापुढेही सुरू रहावे; लोकसेवेचा आपला मार्ग उत्तरोत्तर अधिक प्रशस्त होत जावा आणि त्यासाठी सर्वशक्तिमान परमेश्वराने आपणांस आरोग्यसंपन्न, उत्साहपूर्ण, यशस्वी दीर्घायुष्य प्रदान करावे हीच आजच्या दिनी शुभकामना...- मा. श्री. राम शिंदे, सभापती- महाराष्ट्र विधान परिषद
चौकट-
सर्वप्रथम वाढदिवसाच्या आपणास मनःपूर्वक शुभेच्छा. आपण एक जबाबदार लोकप्रतिनिधी म्हणून जबाबदारी मिळाल्यावर मतदारांच्या अडचणी समजून त्या तातडीने सोडवण्यास आपण नेहमीच प्राधान्य दिले आहे. कामातील चिकाटी व प्रामाणिकपणाच्या जोरावर नागरिकांच्या मनात आपण वेगळी छाप टाकली आहे. मतदारसंघाच्या विकासासाठी नवनवीन संकल्पनांच्या माध्यमातून आपण काम केले आहे. एखादे काम पूर्णत्वास नेण्यासाठीची आपली चिकाटी व जिद्द मी पाहिली आहे. मनमिळावू स्वभाव व कामाप्रती असलेली निष्ठा यामुळेच आपण जनसामान्यांच्या मनात आदराचे स्थान मिळविले आहे, ही कौतुकाची बाब आहे. आपल्या या कार्यामुळे मतदारसंघातील विकासाची गती आणखी वाढेल, असा विश्वास आहे.
आपला हा यशस्वी राजकीय प्रवास असाच निरंतर सुरु राहो, आपणास निरोगी दीर्घायुष्य लाभो या मनःपूर्वक शुभेच्छा ! - मा. श्री. एकनाथ शिंदे- उपमुख्यमंत्री- महाराष्ट्र राज्य
चौकट-
आपल्या वाढदिवसानिमित्त मनःपूर्वक शुभेच्छा! आपण पनवेल विधानसभा मतदारसंघाचे प्रतिनिधित्व करताना सामाजिक जाणिवेचे भान ठेवत लोकसेवेची जबाबदारी प्रामाणिकपणे पार पाडत आहात. लोकशाही व्यवस्थेत जनतेचा प्रतिनिधी म्हणून कार्य करताना, लोकहिताला केंद्रस्थानी ठेवण्याची आपली भूमिका उल्लेखनीय आहे. आपले वडील, श्री. रामशेठ ठाकूर यांनी पनवेल परिसराच्या शैक्षणिक, सामाजिक आणि सार्वजनिक जीवनात अत्यंत मोलाचे योगदान दिले आहे. त्यांच्या कार्याचा वारसा आपण समर्थपणे पुढे नेत आहात, ही बाब निश्चितच प्रशंसनीय आहे. आपल्याला उत्तम आरोग्य, दीर्घायुष्य लाभो आणि पुढील वाटचालीत जनतेच्या अपेक्षांना सार्थ ठरवणारे कार्य करण्याची ऊर्जा सदैव लाभो, हीच मनःपूर्वक सदिच्छा!
मा. श्री. अजितदादा पवार - उपमुख्यमंत्री- महाराष्ट्र राज्य
