मालमत्ता कर न भरणाऱ्या कारखान्यावर, हॉटेल्स,लॉजवरती पनवेल महापालिकेची जप्ती कारवाई
*महापालिकेच्यावतीने थकबाकीदारांच्या मालमत्त्ता अटकावणीस सुरूवात*
पनवेल,दि.21 : पनवेल महापालिकेच्या कर संकलन व कर आकारणी विभागाच्यावतीने मालमत्ता कर न भरणाऱ्या नावडे उपप्रभागातील तळोजा एमआयडीसीमधील थकीत मालमत्ता कर असणाऱ्या कारखान्यावरती जप्तीची कारवाई करण्यात येत आहे. याचबरोबर कळंबोलीमधील थकीत मालमत्ता कर असणाऱ्या हॉटेल्स,लॉजवरती महापालिकेने अटकावणी कारवाईस सुरूवात केली आहे.
दरम्यान आयुक्त तथा प्रशासक मंगेश चितळे यांच्या सुचनेप्रमाणे थकबाकीदारांना जप्तीपुर्व नोटीसानंतर सात दिवस दिवसांचा कालावधी पुर्ण होऊन, मालमत्ता कर न भरलेल्या, वॉरंट नोटीसा देऊनही मालमत्ता कर न भरणाऱ्या आस्थापनावर अटकावणी व जप्ती कारवाईस सुरूवात करण्यात आली आहे.
आतापर्यंत पनवेल महानगरपालिका कार्यक्षेत्रातील विविध नोडमध्ये सुमारे 447 जप्तीपूर्वीच्या नोटीसा व 27 वॉरंट नोटीसांचे वाटप थकबाकीदार मालमत्ता धारकांना दिल्याने थकबाकीदारांचे धाबे दणाणले आहेत. आयुक्त मंगेश चितळे यांच्या सुचनेनूसार जप्ती मोहीम अधिक तीव्र करण्याचा इशारा महापालिकेच्यावतीने देण्यात आला आहे.
आजवर महापालिकेने सातत्याने नागरिकांना मालमत्ता कर भरण्याबाबत आवाहन केले आहे. परंतू आता महापालिकेने थकबाकीदारांच्या विरोधात कठोर पावले उचलण्यास सरुवात केली आहे. उपायुक्त स्वरूप खारगे व कर अधिक्षक महेश गायकवाड तसेच कर अधिक्षक सुनील भोईर यांच्या नेतृत्वाखाली जप्ती कारवाई व वसुली कारवाईसाठी मनुष्यबळ वाढविण्यात येत आहे. वसुली कारवाईला गती देण्यासाठी येत्या दिवसांमध्ये वसुली टिममध्ये वाढ करण्यात येणार आहे.
दरम्यान मालमत्ता कर न भरल्यास त्याच्या शास्तीमध्ये प्रतिमहा २ टक्क्यांची वाढ होत असल्याने तसेच महापालिकेच्यावतीने प्रसिध्दी माध्यमातून केलेल्या आवाहनामुळे नागरिकांच्या मनातील शंकाचे निरसन झाल्याने कर भरण्यास नागरिकांचा चांगला प्रतिसाद दिसून येत आहे. गेल्या काही दिवसापासून मालमत्ता कराच्या भरण्यामध्ये भरघोस वाढ होताना दिसत आहे.
पनवेल महापालिका क्षेत्रात 3लाख 50 हजार निवासी, बिगर निवासी, व्यावसायिक, औद्योगिक आदी नोंदणीकृत मालमत्ता आहेत. या मालमत्ता धारकांकडून कर वसुलीसाठी महापालिकेचे विविध झोन तयार केले आहेत. तसेच ऑनलाईन आणि विविध ॲपच्या माध्यमातून कर भरण्याची सुविधा उपलब्ध करून देण्यात आली आहे. नागरिकांना मालमत्ता कर भरण्यासाठी महापालिकेत न येता ऑनलाईन पध्दतीने भरता यावा यासाठी महापालिकेने 'सिटीझन प्रॉपर्टी टॅक्स पेमेंट गाईड ' तयार केले आहे.
महापालिकेने मालमत्ता कर ऑनलाईन भरण्यासाठी ‘PMC TAX APP’ मोबाईल ॲप विकसित केले आहे. तसेचwww. panvelmc.org या वेबसाईटवरती जाऊनही आपला मालमत्ता कर नागरिकांना भरता येणार आहे. मालमत्ताधारकांना काही शंका असल्यास 1800-5320-340 या टोल फ्री क्रमांवरती संपर्क साधावा असे आवाहन महापालिकेच्यावतीने करण्यात आले आहे.
