उच्चांकी वसुलीमध्ये दिवसेंदिवस वाढ, एका दिवसात 2 कोटी 50 लाखाची वसुली
महापालिका कार्यक्षेत्रातील नागरिकांचा मालमत्ता कर भरण्यास प्रतिसाद वाढला
पनवेल,दि.21: पनवेल महापालिकेच्या कर संकलनामध्ये उच्चांकी वसुलीमध्ये दिवसेंदिवस वाढ होऊ लागली असुन याआधी 14 मार्च रोजी उच्चांकी एका दिवसात 2कोटी 25 लाखाचा भरणा झाला होता. आज पुन्हा त्यापुढील उच्चांकी वसुली झाली असुन ,आजच्या दिवशी 2 कोटी 50 लाखाचा विक्रमी भरणा पालिकेच्या तिजोरीत झाला आहे. महापालिकेच्या कर संकलन व कर आकारणी विभागाच्यावतीने कर वसुलीकामी मोठ्या मालमत्ताधारकांकडे पाठपुरावा सुरू केला आहे. परिणामी कर संकलनामध्ये उच्चांकी वाढ दिसू लागली आहे.
दरम्यान जप्तीपुर्व नोटीसानंतर सात दिवसांचा कालावधी पुर्ण होऊनही मालमत्ता कर न भरलेल्या थकबाकीदारांना वॉरंट नोटीसा बजावण्याच्या कामास वेग आला आहे. आज सतरा वसुली पथकांच्या माध्यमातून तसेच ऑनलाईन व प्रत्यक्षपणे 2 कोटी 50 हजाराचा भरणा पालिकेच्या कर संकलन विभागाकडे झाला आहे. यामध्ये खारघरमधून रघुनाथ विहार आर्मी सोसायटीमधून 47 लाखाची थकीत कराची रक्कम भरण्यात आली. तसेच खारघरमधून 12 लाख 33 हजाराचा पटेल हेरिटेजमधून भरण्यात आली. कळंबोलीमधून कांजी जेठा गामी यांनी 20 लाखाचा कर भरला. कामोठे मधून तोरम हित सिस्टम कंपनीने 2 लाख 97 हजार कर भरला.
आजवर महापालिकेने सातत्याने नागरिकांना सवलती देऊन मालमत्ता कर भरण्याबाबत आवाहन केले आहे. परंतू आता महापालिकेने थकबाकीदारांच्या विरोधात कठोर पावले उचलण्यास सरुवात केली आहे. ज्या थकबाकीदारांना जप्ती नोटीसा दिल्या होत्या, अशा थकबाकीदारांकडून मालमत्ता कर वसुलीसाठी सहाय्यक आयुक्त स्वरूप खारगे ,करअधिक्षक महेश गायकवाड तसेच कर अधिक्षक सुनील भोईर यांच्या नेतृत्वाखाली वसुली पथकाच्या माध्यमातून आज चारही प्रभागातून आजवरची उच्चांकी वसुली झाली आहे. या आर्थिक वर्षामध्ये सुमारे 320 कोटींचा मालमत्ता कर वसूल करण्यात आला आहे.
दरम्यान मालमत्ता कर न भरल्यास त्याच्या शास्तीमध्ये प्रतिमहा २ टक्क्यांची वाढ होत असल्याने तसेच नागरिकांनी आपला मालमत्ता कर भरावा असे आवाहन सातत्याने रिक्षामधून लाऊड स्पीकरच्या माध्यमातून चारही प्रभागांमध्ये केले जात आहे. या आवाहनाला नागरिकांचा चांगला प्रतिसाद दिसून येत आहे. गेल्या दोन –तीन दिवसापासून मालमत्ता कराच्या भरण्यामध्ये वाढ होताना दिसत आहे.
पनवेल महापालिका क्षेत्रात 3लाख 50 हजार निवासी, बिगर निवासी, व्यावसायिक, औद्योगिक आदी नोंदणीकृत मालमत्ता आहेत. या मालमत्ता धारकांकडून कर वसुलीसाठी महापालिकेचे विविध झोन तयार केले आहेत. तसेच ऑनलाईन आणि विविध ॲपच्या माध्यमातून कर भरण्याची सुविधा उपलब्ध करून देण्यात आली आहे. नागरिकांना मालमत्ता कर भरण्यासाठी महापालिकेत न येता ऑनलाईन पध्दतीने भरता यावा यासाठी महापालिकेने 'सिटीझन प्रॉपर्टी टॅक्स पेमेंट गाईड ' तयार केले आहे.
महापालिकने मालमत्ता कर ऑनलाईन भरण्यासाठी ‘PMC TAX APP’ मोबाईल ॲप विकसित केले आहे. तसेचwww. panvelmc.org या वेबसाईटवरती जाऊनही आपला मालमत्ता कर नागरिकांना भरता येणार आहे. मालमत्ताधारकांना काही शंका असल्यास 1800-5320-340 या टोल फ्री क्रमांवरती संपर्क साधावा असे आवाहन महापालिकेच्यावतीने करण्यात आले आहे.