पनवेल महानगरपालिका’मालमत्ता हस्तांतरण प्रणाली राबविणारी महाराष्ट्रातील पहिली महानगरपालिका-मुख्यमंत्री एकनाथ शिंदे


पनवेल महानगरपालिका’मालमत्ता हस्तांतरण प्रणाली राबविणारी महाराष्ट्रातील पहिली महानगरपालिका-मुख्यमंत्री एकनाथ शिंदे


पनवेल,दि.5 : पनवेल महानगरपालिकेचा मालमत्ता कर विभाग तसेच महाराष्ट्र शासनाच्या नोंदणी व मुद्रांक विभाग  यांच्या संयुक्त विद्यमाने एकत्रित मालमत्ता हस्तांतरण प्रणाली सुविधेचा शुभारंभ आज दिनांक 5जानेवारी,2024 रोजी  मुख्यमंत्री मा.श्री.एकनाथ शिंदे, उपमुख्यमंत्री मा.श्री.देवेंद्र फडणवीस, उपमुख्यमंत्री मा.श्री.अजित पवार, पालकमंत्री मा.श्री.उदय सामंत, महिला व बालविकास मंत्री मा.कु.आदिती तटकरे, विधान परिषद आमदार श्री. निरंजन डावखरे, श्री.अनिकेत तटकरे, विधानसभा आमदार श्री. भरत गोगावले, श्री. प्रशांत ठाकुर, श्री. रविंद्र पाटील, श्री. महेंद्र थोरवे, श्री.महेश बालदी, श्री. महेंद्र दळवी, डॉ. बाबासाहेब तंत्रशास्त्र विद्यापीठ, लोणेरे कुलगुरु प्रा.डॉ. कारभारी काळे, विभागीय आयुक्त कोकण विभाग डॉ. महेंद्र कल्याणकर, जिल्हाधिकारी डॉ. योगेश म्हसे, आयुक्त श्री.गणेश देशमुख यांच्या प्रमुख उपस्थितीत ‘शासन आपल्या दारी’ या कार्यक्रमांतर्गत लोणेरे, माणगाव येथे करण्यात आला. महाराष्ट्रात ही सुविधा राबविणारी ‘पनवेल महानगरपालिका’ ही पहिली  महानगरपालिका आहे.

व्यवसायपूरकता (इज ऑफ  डुंइंग बिझनेस) या उपक्रमांतर्गत नागरी स्वराज्य संस्थामार्फत नागरिकांना देण्यात येणाऱ्या विविध नागरी सेवा (इंटिग्रेटेड वेब बेस्ड पोर्टल) मार्फत एकात्मिक स्वरूपात सोयी सुविधा देण्याच्या दृष्टीने पनवेल महानगरपालिकेच्यावतीने एक पाऊल पुढे टाकले आहे. महापालिकेच्यावतीने देण्यात येणाऱ्या सुविधा अधिक पारदर्शक होण्याच्या दृष्टीने ही नवीन सुविधा सुरू करण्यात येणार आहे. एखाद्या मालमत्तेची खरेदी विक्री झाल्यानंतर त्या मालमत्तेची मिळकत पत्रिका (प्रॉपर्टी कार्ड) आणि करदाता अभिलेख (टॅक्स पे रेकॉर्ड) यांवरती नोंद केली जाते. महापालिका देणार असलेल्या या नवीन सुविधेअंतर्गत महापालिका हद्दीतील मालमत्ता खरेदी- विक्री करतेवेळी सहाय्यक निबंधक पनवेल यांच्याकडे  नोंद करताना महानगरपालिकेच्या कर देयकावरील मालमत्ता सांकेतिक क्रमांक आपल्या दस्तामध्ये नोंद करणे आवश्यक असणार आहे. तसेच मालमत्ताधारकांनी मालमत्ता खरेदी करताना मालमत्तेचा मालमत्ता कर थकबाकीसह पूर्ण भरणा केलेबाबत खातरजमा करुन पावती आपल्या दस्तास जोडणे आवश्यक आहे. मालमत्ताधारकांनी आपल्या नोंदणीदस्तामध्ये मालमत्ता सांकेतिक क्रमांक नमूद केल्यास आपले नाव महापालिकेच्या मालमत्ता कर प्रणालीत तात्काळ दाखल होणार आहे. यामुळे खरेदीदाराला पालिकेकडे करदाता म्हणून नाव नोंदणी करण्यासाठी वेगळा अर्ज करावा लागणार नाही, तसेच मालमत्ताधारकांना आपले स्वत:चे कर देयक पालिकेच्या वेबसाईटवरती सहजरित्या उपलब्ध  होणार आहे,  अशी माहिती आयुक्त तथा प्रशासक श्री.गणेश देशमुख यांनी दिली आहे. 

  या सुविधेचा पनवेल महानगरपालिका कार्यक्षेत्रातील नागरिकांना मोठा फायदा होणार असून नागरिकांचा वेळ आणि पैसे या दोन्हीची बचत होणार आहे. सहाय्यक निबंधक पनवेल यांच्या कार्यालयामध्ये देखील या सुविधेची माहिती देणारे फलक दर्शनी भागात लावण्यात आले आहे जेणे करून याबाबत मालमत्ताधारकांमध्ये याबाबत माहिती मिळेल. या आर्थिक वर्षामध्ये महापालिकेचा मालमत्ता कर भरणाऱ्या मालमत्ताधारकांकडून उत्तम प्रतिसाद दिसून येत आहे. एप्रिल महिन्यापासून ते आज दिनांक 5 जानेवारी,2024 रोजी 236 कोटी रूपयांची भर महापालिकेच्या तिजोरीमध्ये झाली आहे. ऑनलाईन पध्दतीने मालमत्ता कर भरल्यास मालमत्तांधारकांना दोन टक्क्यांची सूट देण्यात येत आहे. महापालिकने मालमत्ता कर ऑनलाईन भरण्यासाठी ‘PMC TAX APP’ मोबाईल ॲप विकसित केले आहे. तसेच www. panvelmc.org या वेबसाईटवरती जाऊनही आपला मालमत्ता कर नागरिकांना भरता येणार आहे. 

कोट

‘शासन आपल्या दारी’ या मोहिमेच्या दृष्टीने पनवेल महापालिकेने महत्वाचे पाऊल उचलेले आहे. पनवेल महापालिकेचा स्वयंचलित पद्धतीने करदाता नोंद करण्याचा उपक्रम अतिशय स्तुत्य आहे. मालमत्ताधारकांना मालमत्ता खरेदी केल्यावर मालमत्ता देयकांवर नावाचा फेरफार करण्यासाठी स्वत:ला पालिकेमध्ये जाण्याची गरज राहणार नसून. यामुळे नागरिकांचा वेळ आणि पैसा दोन्ही वाचणार आहे. एका बाजुला पालिकेचा प्रशासकीय वेळ आणि दुसऱ्या बाजूला ग्राहकाचा वेळ वाचणार आहे. हा दुहेरी फायदा होणार आहे.

मा.मुख्यमंत्री  श्री. एकनाथ शिंदे

कोट

इज ऑफ  डुंइंग बिझनेस या उपक्रमांर्तगत पालिकेचा हा उपक्रम अतिशय योग्य आणि इतर महापलिकेंसाठी आदर्श ठरेल. यामुळे करदाता आणि महापालिका दोघांचाही लाभ होणार आहे. या सुविधेच्या माध्यमातून नव्यानेच निर्माण झालेल्या पनवेल महानगरपालिकेने प्रशासकीय सुधारणांमधील आपला वेग दर्शविला आहे.

मा. उपमुख्यमंत्री श्री.देवेंद्र फडणवीस

कोट

नागरिकांचे हीत हे प्रशासनाचे सर्वोत्तम ध्येय असले पाहिजे. पनवेल महानगरपालिकेने राबविलेला हा उपक्रम अतिशय स्तुत्य असून आयुक्त आणि एकूण प्रशासन अभिनंदनास पात्र आहेत. या उपक्रमामुळे करदात्यांच्या वेळेचा आणि पैशाचा अपव्यय थांबणार आहे. महापालिका पुढेही असेच लोकोपयोगी उपक्रम राबवेल, असा विश्वास वाटतो.

मा.उपमुख्यमंत्री श्री. अजित पवार

कोट

महापालिकेचे आयुक्त श्री.गणेश देशमुख यांनी पालिकेच्या कारभारात पारदर्शकता ,गतिमानता व लोकाभिमुखता आणण्यासाठी आयजीआर इंटिग्रेशन करून तात्काळ मालमत्ता नावांमध्ये बदल करता येण्याचा स्तुत्य उपक्रम राबविला आहे.

आमदार श्री. प्रशांत ठाकूर

कोट

या नवीन सुविधेमध्ये पालिका कार्यक्षेत्रातील मालमत्ता धारकांनी मालमत्ता खरेदी करण्यापूर्वी मालमत्ता कर पूर्ण भरला आहे की नाही यांची  खात्री करावी. तसेच खरदी विक्री दस्तांमध्ये मालमत्ता सांकेतिक क्रमांक(युपिक आयडी नंबर) नमुद करावा जेणे करून दस्तांची नोंदणी झाल्यावरती महापालिकेच्या सॉफ्टवेअरमध्ये खरेदीदाराच्या नावाचा तात्काळ समावेश होईल. 

 आयुक्त तथा प्रशासक श्री. गणेश देशमुख, पनवेल महानगरपालिका

चौकट :- 

स्वयंचलित करदाता नोंदणी पध्दतीचे फायदे :

1.करदाता नोंदणीच्या वेळेत बचत होऊन पेपरलेस काम होणार.

2.मानवी चुका कमी होणार.

3. शंभर टक्के अचूकपणे मालमत्ता धारकाच्या नावाचे समावेशन होते.

4.नागरिकांना मालमत्तेवरील नाव बदलण्यासाठी महापालिकेत येण्याची गरज लागणार नाही.

5.दस्ताऐवजांमध्ये मानवी हस्तक्षेप राहणार नाही. 

6. जलद लोकाभिमुख पारदर्शक पध्दतीने कारभार होणार.