गणेशोत्सवाच्या शुभ मुहूर्तावर नैना प्रकल्प परिसरामध्ये सर्वसमावेशक गृहनिर्माण योजनेंतर्गत (Inclusive Housing) सदनिका विक्री योजनेचा आरंभ
नवी मुंबई-नैना प्रकल्पाच्या मंजूर DCPR नुसार ४००० चौ. मी. किंवा अधिक क्षेत्रफळ असलेल्या भूखंडांमध्ये सर्वसमावेशक (Inclusive Housing) गृहनिर्माण योजने अंतर्गत आर्थिकदृष्टया दुर्बल घटक व अल्प उत्पन्न गटातील घरे विकसित करण्याची तरतूद आहे. त्या अनुषंगाने भूखंडाच्या एकूण क्षेत्रफळापैकी २०% जागा ही आर्थिकदृष्टया दुर्बल घटक व अल्प उत्पन्न गटांच्या सदनिकांसाठी खाजगी विकासकांमार्फत नैना प्रकल्प परिसरामध्ये उपलब्ध करून देण्यात आलेली आहे. त्यानुसार गणेशोत्सवाच्या शुभ मुहूर्तावर एकूण १७१ सदनिकांची गृहनिर्माण योजना सादर करण्यात येत आहे. यामध्ये आर्थिकदृष्टया दुर्बल घटकांसाठी १७ तर अल्प उत्पन्न गटांसाठी १६४ सदनिका विक्रीसाठी उपलब्ध करून देण्यात आल्या आहेत.
सदर तरतुदीनुसार संबंधित प्रकल्पाकरिता भोगवटा प्रमाणपत्र प्राप्त झाल्यानंतर सर्वसमावेशक गृहनिर्माण योजनेंतर्गत (Inclusive Housing) सदनिकांची माहिती ७ विकासकांनी सिडकोस सादर केली आहे. त्यानुषंगाने अशा सदनिकांसाठी पात्र उमेदवारांची सोडत पध्दतीने निवड करण्यासाठी सिडको सुलभकाची (facilitator) भूमिका साकारणार आहे. सदर सोडतीनंतर पात्र उमेदवारांच्या नावाची यादी संबंधित विकासकांना सिडकोतर्फे कळवण्यात येईल.
सदर योजनेत सहभागी होऊ इच्छिणा-या अर्जदारांकडून ऑनलाईन पद्धतीने अर्ज मागविण्यात येऊन अर्जदारांनी सादर केलेल्या कागदपत्रांची पडताळणी करुन सोडतीसाठी पात्रता निश्चिती करण्यात येईल. इच्छुक अर्जदार lottery.cidcoindia.com या संकेतस्थळास भेट देऊन सदर गृहनिर्माण योजनेमध्ये सहभागी होऊ शकतात. त्याचप्रमाणे सिडकोच्या अधिकृत समाज माध्यमांवरून देखील सदर योजनेविषयी माहिती उपलब्ध करून देण्यात येईल.
या गृहनिर्माण योजनेकरिता ऑनलाइन नोंदणी 21 सप्टेंबर 2023 ते 18 ऑक्टोबर 2023 या कालावधीत सुरू राहणार आहे. संगणकीय सोडतीकरिता ऑनलाइन अर्जांवरील प्रक्रिया 29 सप्टेंबर 2023 ते 18 ऑक्टोबर 2023 या कालावधीत सुरू राहणार आहे. ऑनलाइन शुल्क भरणा 29 सप्टेंबर 2023 ते 19 ऑक्टोबर 2023 या कालावधीत सुरू राहील. सोडतीकरिता स्वीकृत अर्जांची प्रारूप यादी 02 नोव्हेंबर 2023 रोजी तर अंतिम यादी 04 नोव्हेंबर 2023 रोजी प्रसिद्ध करण्यात येणार आहे. गृहनिर्माण योजनेची संगणकीय सोडत 08 नोव्हेंबर 2023 रोजी सिडको भवन येथे काढण्यात येणार आहे.
सर्वसमावेशक योजनेंतर्गत प्राप्त होणा-या सदनि पद्धतीने पात्र उमेदवारांची निवड करून ती यादी संबंधित विकासकास पाठविणे एवढीच जबाबदारी सिडकोची आहे. तद्नंतरची सर्व कार्यवाही जसे – सदनिकेची संपूर्ण रक्कम भरून घेणे, गृह कर्ज उभारणीसाठी ना-हरकत प्रमाणपत्र यशस्वी उमेदवारास देणे, अर्जदारासोबत सदनिकेचा करारनामा करणे, दुय्यम निबंधक कार्यालयाकडे करारनाम्याची नोंदणी करणे, सहकारी गृहनिर्माण संस्था स्थापन करणे, अर्जदारांच्या काही शंका असल्यास त्याचे निरसन करणे, इ. बाबी संबंधित विकासकामार्फत पूर्ण केल्या जाणार आहेत.
पात्र उमेदवारांची सोडत पध्दतीने निवड करून त्यांची यादी संबंधित विकासकास पाठविल्यानंतर पुढील कार्यवाहीस सिडको कोणत्याही परिस्थितीत जबाबदार राहणार नाही याची सर्वांनी कृपया नोंद घ्यावी.