राष्ट्रीय बौद्धिक दिव्यांगजन सशक्तीकरण संस्थेमध्ये जागतिक दिव्यांग दिन दिमाखात साजरा!
खारघर(प्रतिनिधी)- खारघर येथील राष्ट्रीय बौद्धिक दिव्यांगजन सशक्तीकरण संस्था,नवी मुंबई या संस्थेचा जागतिक दिव्यांग दिन शनिवार दिनांक:३ डिसेंबर २०२२ रोजी मोठ्या दिमाखात संपन्न झाला. या दिनाचे औचित्य साधून दिव्यांग जन-जागृतीसाठी खारघर मधील 'उत्सव चौक' ते सेक्टर-५" परिसरात सकाळी प्रभात फेरी काढण्यात आली होती. या प्रभात फेरीत बौद्धिक दिव्यांग मुले, त्यांचे पालक, प्रशिक्षणार्थी तसेच संस्थेचे सर्व कर्मचारी सहभागी झाले होते, मुलांनी प्रभात फेरीमध्ये वेगवेगळ्या दिव्यांगाच्या माहिती विषयी बहुभाषिक संदेशांचे फलक हाती घेतले व घोषणाही दिल्या.
या कार्यक्रमासाठी प्रमुख पाहुणे लाभले होते, श्री अनिल कुमार दास आयकर अतिरिक्त आयुक्त आणि सन्माननीय अतिथी श्री एम प्रकाश (माजी अध्यक्ष) रोटरी क्लब नवी मुंबई.
हा कार्यक्रम 'राष्ट्रीय बौद्धिक दिव्यांगजन सशक्तीकरण संस्थेचे प्रमुख श्री. बी. वी. रामकुमार आणि संस्थेचे प्रभारी अधिकारी डॉ. रवी प्रकाश सिंह यांच्या मार्गदर्शनाखाली पार पडला. या दिवशी सांस्कृतिक कार्यक्रमाचे ही आयोजन करण्यात आले होते.
या कार्यक्रमाचे बौद्धिक दिव्यांगजन मुले व त्यांचे पालक, प्रशिक्षणार्थी तसेच संस्थेचे कर्मचारी यांनी सहभाग घेतला होता. यामध्ये नृत्य, गायन, नाटक, इत्यादी कलाकृतींचे सादरीकरण करण्यात आले. या विशेष दिनानिमित्त बौद्धिक दिव्यांगजन मुलांसाठी घेतलेल्या स्पर्धा मधील विजेत्यांना मान्यवरांकडून बक्षिसांचे वाटप करण्यात आले तसेच संस्थेला सतत सहकार्य करणाऱ्या पालकांचा देखील मान्यवरांच्या हस्ते सन्मान करण्यात आला. यानंतर संस्थेचे प्रभारी अधिकारी डॉ. रवी प्रकाश सिंह सर यांनी दिव्यांगजन सशक्तीकरण या बद्दल उपस्थितांना मार्गदर्शन केले, व संस्थेच्या भविष्यातील उपक्रमाविषयी माहिती दिली!
