जागतिक योग दिनानिमित्त योगासने व स्वच्छता मोहिम
पनवेल(प्रतिनिधी) जागतिक योग दिनानिमित्त मंगळवार २१ जून रोजी सकाळी ६ वाजता भाजपचे उत्तर रायगड जिल्हाध्यक्ष आमदार प्रशांत ठाकूर यांच्यासमवेत माची प्रबळगड येथे योगासने करण्याची संधी मिळणार असून योग दिनाचे औचित्य साधून प्रबळगड येथे स्वच्छता मोहिम होणार आहे.
२१ जून जागतिक योग दिन म्हणून संपूर्ण जगात साजरा केला जातो. त्या अनुषंगाने माची प्रबळगड येथे होणाऱ्या या कार्यक्रमात आरोग्य सेवा समिती, पनवेलचे योग केंद्र प्रमुख सूर्यकांत फडके, सहशिक्षक अरविंद गोडबोले योग संदर्भात मार्गदर्शन करणार आहेत. यामध्ये आमदार प्रशांत ठाकूर यांच्या समवेत युवा व ज्येष्ठ योगासने करणार आहेत, त्यानंतर प्रबळगड येथे स्वच्छता अभियान राबविण्यात येणार आहे.
