राज्यव्यापी विशेष ग्रामसभेचे 16 नोव्हेंबरला तर 27,28 नोव्हेंबरला मतदार नोंदणी शिबिराचे आयोजन
*ग्रामसभेचा एकच नारा.... मतदार नोंदणी करणार गाव सारा..!*
*नंतर करू नका तक्रार... आजच व्हा मतदार...!*
अलिबाग,जि.रायगड,दि.15 (जिमाका) :- मा.भारत निवडणूक आयोगाकडून दि.1 जानेवारी 2022 या अर्हता दिनांकावर आधारित मतदारयाद्या विशेष संक्षिप्त पुनर्रिक्षण कार्यक्रम-2022 जाहीर केला आहे.
या कार्यक्रमांतर्गत जिल्ह्यात मंगळवार, दि.16 नोव्हेंबर रोजी विशेष ग्रामसभेचे तर दि.शनिवार दि.27 नोव्हेंबर व रविवार, दि.28 नोव्हेंबर रोजी मतदार नोंदणी शिबीर-2021 चे विशेष आयोजन करण्यात आले आहे.
या विशेष ग्रामसभेच्या व मतदार नोंदणी शिबिराच्या निमित्ताने मतदार यादीचे वाचन, नव मतदार नोंदणी, आधीच्या मतदारांच्या यादीची तपासणी आदी महत्वाची कामे करण्यात येणार आहे.
दि.1 जानेवारी 2022 रोजी 18 वर्ष पूर्ण असलेल्या भारतीय नागरिकास मतदान करण्याचा अधिकार प्राप्त होईल. मात्र मतदार यादीत नाव असेल तरच आपण मतदान करू शकतो, संविधानाने दिलेल्या या मौलिक अधिकाराचा वापर करण्याची संधी मतदानाच्या वेळी कोणत्याही पात्र मतदाराने गमावू नये, यासाठी या विशेष ग्रामसभेस जास्तीत जास्त ग्रामस्थांनी उपस्थित राहावे तसेच त्यांनी राज्यव्यापी मतदार नोंदणी शिबिराचाही लाभ घ्यावा, असे आवाहन जिल्हा निवडणूक निर्णय अधिकारी तथा जिल्हाधिकारी डॉ. महेंद्र कल्याणकर आणि उपजिल्हा निवडणूक अधिकारी श्रीमती स्नेहा उबाळे यांनी केले आहे.
या विशेष ग्रामसभेच्या तसेच राज्यव्यापी मतदार नोंदणी शिबिराच्या वेळीदेखील विशेष कोविड-19 लसीकरण मोहीमही राबविण्यात येणार असल्याचे जिल्हा प्रशासनाने जाहीर केले आहे.
