गरजेपोटी घरे कायम करण्याबाबत नगरविकास मंत्री एकनाथ शिंदेंची भेट-पनवेल - उरण महाविकास आघाडीच्या नेत्यांनी घेतली भेट
भेटीदरम्यान महाडच्या आमदारांनीही लावली उपस्थिती
पनवेल : वार्ताहर
पनवेल महानगरपालिकेने लादलेल्या जाचक मालमत्ता कर प्रणाली विरुद्ध स्व.दि.बा.पाटील स्थानिक प्रकल्पग्रस्त शेतकरी संघर्ष समितीच्या पदाधिकाऱ्यांनी राज्याचे नगरविकास मंत्री एकनाथ शिंदे यांची नुकतीच भेट घेवून यावर नागरिकांच्या हिताचे निर्णय घेण्याबाबत चर्चा करण्यात आली, यावेळी नगरविकास मंत्री एकनाथ शिंदे यांनी सकारात्मक पवित्रा घेणार असल्याचे आश्वासन उपस्थितांना दिले. यावेळी स्व.दि.बा.पाटील स्थानिक प्रकल्पग्रस्त शेतकरी संघर्ष समितीचे अध्यक्ष बबनदादा पाटील यांच्यासह शेकापचे आमदार बाळाराम पाटील, शिवसेनेचे जिल्हाप्रमुख शिरीष घरत, मा.आ.मनोहर भोईर, राष्ट्रवादीचे सरचिटणीस प्रशांत पाटील तसेच महाडचे आमदार भरत गोगावले उपस्थित राहिले होते.
समितीच्या सर्व पदाधिकाऱ्यांसह राज्याचे मुख्यमंत्री उद्धव ठाकरे तसेच नगरविकास मंत्री एकनाथ शिंदे यांची भेट घेऊन यावर निर्णय घेण्यास भाग पाडण्यासाठी समितीच्या पदाधिकाऱ्यांकडून गेले दीड वर्षे प्रयत्न सुरू आहेत. वेळोवेळी पाठपुरावा करीत तसेच ठिकठिकाणी बैठका घेवून नागरिकांचे विचार एकूण सदर प्रक्रिया सुरू ठेवली आहे. मुंबई, ठाणे येथे ५०० फुटापर्यंतच्या घराना मालमत्ता कर माफी असताना पनवेल महानगरपालिकेच्यावतीने मात्र नागरिकांवर अन्यायकारक कर लादला जात आहे. त्यामुळे पनवेल महानगरपालिकेच्यावतीने लादला गेलेला मालमत्ता कर हा रद्द करण्यात यावा अशी मागणी समितीचे अध्यक्ष बबनदादा पाटील यांनी समोर आणली. याबाबत ज्या पद्धतीने मुंबई आणि ठाण्यासारख्या शहरांमध्ये ५०० फुटांपर्यंत कराबाबत माफी देण्यात आली आहे त्या पद्धतीने पनवेल महानगरपालिका हद्दीतील नागरिकांनाही या करामध्ये माफी मिळावी यासाठी स्व.दि.बा.पाटील स्थानिक प्रकल्पग्रस्त शेतकरी संघर्ष समितीच्या सर्व पदाधिकाऱ्यांनी राज्याचे नगरविकास मंत्री एकनाथ शिंदे यांची भेट घेतली.
