मालमत्ता कर भरायचे शेवटचे सात दिवस शिल्लक;नागरिकांनी लवकरात लवकर मालमत्ता कर भरण्याचे महापालिकेचे आवाहन
*एका दिवसात पाच कोटीचा उच्चांकी भरणा*
पनवेल,दि.24: पनवेल महापालिकेच्या मालमत्ता कर भरण्याचे शेवटचे सात दिवस शिल्लक राहीले असून, मालमत्ताधारकांनी आपला मालमत्ता कर लवकरात लवकर भरावा असे आवाहन महापालिकेच्यावतीने करण्यात आले आहे. दरम्यान आज दिनांक 24 मार्च रोजी एका दिवसात पाच कोटीचा उच्चांकी भरणा पालिकेच्या तिजोरीत झाला आहे.
मालमत्ता कर भरण्यासाठी 31 मार्च ही शेवटची तारीख असून आयुक्त श्री. मंगेश चितळे यांच्या निर्देशानूसार मालमत्ता कर भरण्याचे शेवटचे सात दिवस राहील्याने शनिवार व रविवार कार्यालये,सुट्टीच्या दिवशीही नागरिकांसाठी खुली ठेवण्यात येणार आहे. मा. उच्च न्यायालयाने कार्यक्षेत्रातील मालमत्ता कर आकारणीस पालिकेस कोणतीही स्थगिती दिलेली नसल्याने तसेच पुढील वर्षाची दोन टक्के शास्ती वाचविण्यासाठी मालमत्ताधारकांनी 31 मार्चपूर्वी आपला मालमत्ता कर भरावा असे आवाहन महापालिकेच्यावतीने करण्यात आले आहे.
सध्या 13 वसुली पथकांच्या माध्यमातून महापालिका कार्यक्षेत्रात वसुली मोहिम सुरू आहे. आतापर्यंत पनवेल महानगरपालिका कार्यक्षेत्रातील विविध नोडमध्ये सुमारे 447 जप्तीपूर्वीच्या नोटीसा व 27 वॉरंट नोटीसांचे वाटप थकबाकीदार मालमत्ता धारकांना दिल्याने थकबाकीदारांचे धाबे दणाणले आहेत. महापालिकेने थकबाकीदारांच्या विरोधात कठोर पावले उचलण्यास सरुवात केली आहे. ज्या थकबाकीदारांना जप्ती नोटीसा दिल्या होत्या यांना आता वॉरंट नोटीसा देण्याचे काम पालिकेने युध्दपातळीवर सुरू केले आहे. तसेच अटकावणीची मोहिमही जोमाने सुरू आहे. याचा थकबाकीदार यांनी गांभीर्याने विचार करणे आवश्यक आहे. ज्या थकबाकीदारांना जप्ती नोटीसा दिल्या होत्या, अशा थकबाकीदारांकडून मालमत्ता कर वसुलीसाठी आयुक्त श्री.मंगेश चितळे यांच्या मार्गदर्शनाखाली उपायुक्त स्वरूप खारगे यांच्या नेतृत्वाखाली कर अधिक्षक महेश गायकवाड तसेच कर अधिक्षक सुनील भोईर हे वसुली पथकाच्या माध्यमातून दररोज उच्चांकी वसुली करत आहेत.
मालमत्ता कर भरा या पालिकेच्या आवाहनाला नागरिकांचा चांगला प्रतिसाद दिसून येत आहे. गेल्या पंधरा-वीस दिवसापासून दररोज 3-4 कोटीहून अधिक भरणा होताना दिसत आहे. आज एकुण 5 कोटीचा उच्चांकी भरणा पालिकेच्या तिजोरीत झाला आहे. पनवेल महापालिका क्षेत्रात 3 लाख 50 हजार निवासी, बिगर निवासी, व्यावसायिक, औद्योगिक आदी नोंदणीकृत मालमत्ता आहेत. या मालमत्ता धारकांकडून कर वसुलीसाठी महापालिकेचे विविध झोन तयार केले आहेत. तसेच ऑनलाईन आणि विविध ॲपच्या माध्यमातून कर भरण्याची सुविधा उपलब्ध करून देण्यात आली आहे. 2024-25 या आर्थिक वर्षात आत्तापर्यंत 383 कोटी मालमत्ता कर जमा झाला आहे.
नागरिकांना मालमत्ता कर भरण्यासाठी महापालिकेत न येता ऑनलाईन पध्दतीने भरता यावा यासाठी महापालिकेने 'सिटीझन प्रॉपर्टी टॅक्स पेमेंट गाईड ' तयार केले आहे. महापालिकने मालमत्ता कर ऑनलाईन भरण्यासाठी ‘PMC TAX APP’ मोबाईल ॲप विकसित केले आहे. तसेचwww. panvelmc.org या वेबसाईटवरती जाऊनही आपला मालमत्ता कर नागरिकांना भरता येणार आहे. मालमत्ताधारकांना काही शंका असल्यास 1800-5320-340 या टोल फ्री क्रमांवरती संपर्क साधावा असे आवाहन महापालिकेच्यावतीने करण्यात आले आहे.
.
