थकीत कर वसुलीसाठी महापालिकेची धडक मोहिम सुरू;थकबाकीदारांच्या मालमत्त्ता अटकावणीस सुरूवात
पनवेल,दि.०7: नुकत्याच झालेल्या सुनावणी दरम्यान मा. उच्च न्यायालयाने पनवेल महानगरपालिका कार्यक्षेत्रातील मालमत्ता कर आकारणीस पालिकेस कोणतीही स्थगिती दिलेली नाही . त्यामुळे महापालिकेने थकबाकीदारांकडून वसुली करण्यावरती भर दिला आहे. पनवेल महापालिकेच्या कर संकलन व कर आकारणी विभागाच्यावतीने थकबाकीदारांच्या मालमत्ता जप्ती पूर्व नोटीसांबरोबर वॉरंट नोटीसा दिल्यानंतर आता मालमत्ता कर भरण्यास नागरिकांचा प्रतिसाद वाढला आहे. खारघर, कळंबोली, पनवेल, कामोठे चारही प्रभागामध्ये नागरिकांचा मालमत्ता कर भरण्याकडे ओढा वाढू लागला आहे. दरम्यान आयुक्त श्री.गणेश देशमुख यांच्या सुचनेप्रमाणे जप्तीपुर्व नोटीसानंतर सात दिवसांचा कालावधी पुर्ण होऊनही मालमत्ता कर न भरलेल्या थकबाकीदारांनी मालमत्ता कर भरावा यासाठी धडक मोहिम सुरू करण्यात आली आहे.
आतापर्यंत पनवेल महानगरपालिका कार्यक्षेत्रातील विविध नोडमध्ये सुमारे 360 हून अधिक जप्तीपूर्वीच्या नोटीसा व 20 वॉरंट नोटीसांचे वाटप थकबाकीदार मालमत्ता धारकांना दिल्याने थकबाकीदारांचे धाबे दणाणले आहेत. उपायुक्त गणेश शेटे यांच्या सुचनेनूसार जप्ती मोहीम अधिक तीव्र करण्यात आली असून, जप्ती नोटीस दिलेल्या थकबाकीदारांकडून वसुलीसाठी धडक मोहिमेवर भर दिला जात आहे. परिणामी नागरिकांचा मालमत्ता कर भरण्याचा प्रतिसाद वाढू लागला आहे. आज दिनांक 7 मार्च रोजी चारही प्रभागामधून 40 लाखाहून अधिक मालमत्ता कराची वसुली वसुली पथकाच्या माध्यमातून केली आहे.
आजवर महापालिकेने सातत्याने नागरिकांना सवलती देऊन मालमत्ता कर भरण्याबाबत आवाहन केले आहे. परंतू आता महापालिकेने थकबाकीदारांच्या विरोधात कठोर पावले उचलण्यास सरुवात केली आहे. ज्या थकबाकीदारांना जप्ती नोटीसा दिल्या होत्या यांना आता वॉरंट नोटीसा देण्याचे काम पालिकेने युध्दपातळीवर सुरू केले आहे. तसेच अटकावणीच्या मोहिमेलाही सुरूवात करण्यात आली आहे.
दरम्यान मालमत्ता कर न भरल्यास त्याच्या शास्तीमध्ये प्रतिमहा २ टक्क्यांची वाढ होत असल्याने तसेच नागरिकांनी आपला मालमत्ता कर भरावा असे आवाहन सातत्याने रिक्षामधून लाऊड स्पीकरच्या माध्यमातून चारही प्रभागांमध्ये केले जात आहे. या आवाहनाला नागरिकांचा चांगला प्रतिसाद दिसून येत आहे. गेल्या दोन –तीन दिवसापासून मालमत्ता कराच्या भरण्यामध्ये वाढ होताना दिसत आहे. दरम्यान आज मुनलाईट अपार्टमेंट तळोजा,किंग्ज पॅलेस,प्रजापती कास्केड,हर्मोनी सोसायटी,किबा हॉटेल खांदा कॉलनी,मार्बल मार्केट,कामधेनू खारघर,गणेश जनरल स्टोअर पनवेल,अशा विविध ठिकाणी आज वसुली पथकाने भेटी दिल्या.पनवेल महापालिका क्षेत्रात 3लाख 50 हजार निवासी, बिगर निवासी, व्यावसायिक, औद्योगिक आदी नोंदणीकृत मालमत्ता आहेत. या मालमत्ता धारकांकडून कर वसुलीसाठी महापालिकेचे विविध झोन तयार केले आहेत. तसेच ऑनलाईन आणि विविध ॲपच्या माध्यमातून कर भरण्याची सुविधा उपलब्ध करून देण्यात आली आहे. २०२३-२४ या आर्थिक वर्षात आत्तापर्यंत 272 कोटी मालमत्ता कर जमा झाला आहे. नागरिकांना मालमत्ता कर भरण्यासाठी महापालिकेत न येता ऑनलाईन पध्दतीने भरता यावा यासाठी महापालिकेने 'सिटीझन प्रॉपर्टी टॅक्स पेमेंट गाईड ' तयार केले आहे.
महापालिकने मालमत्ता कर ऑनलाईन भरण्यासाठी ‘PMC TAX APP’ मोबाईल ॲप विकसित केले आहे. तसेचwww. panvelmc.org या वेबसाईटवरती जाऊनही आपला मालमत्ता कर नागरिकांना भरता येणार आहे. मालमत्ताधारकांना काही शंका असल्यास 1800-5320-340 या टोल फ्री क्रमांवरती संपर्क साधावा असे आवाहन महापालिकेच्यावतीने करण्यात आले आहे.