तुर्भे विभाग कार्यालयामार्फत तोडक मोहिमेचे आयोजन करुन अनधिकृत बांधकाम निष्कासित करण्यात आले
नवी मुंबई (प्रतिनिधी)- नवी मुंबई महानगरपालिकेच्या कार्यक्षेत्रातील तुर्भे विभागाअंतर्गत श्री. संतोष सावळाराम भोईर (अनधिकृत बांधकामधारक) यांनी घर क्रमांक 05 च्या मागे मोकळा भुखंड सानपाडा या ठिकाणी महानगरपालिकेची कोणतीही पुर्व परवानगी न घेता अनधिकृतपणे बांधकाम सुरु केले होते. सदर अनधिकृत बांधकामास डी विभाग कार्यालय, तुर्भे यांचेमार्फत महाराष्ट्र नियोजन व नगररचना अधिनियम 1966 मधील कलम 54 अन्वये नोटीस बजावण्यात आलेली होती. अनाधिकृत बांधकामधारकाने सदर ठिकाणी अनधिकृत बांधकाम सुरु ठेवले होते.
सदर अनधिकृत बांधकामावर तुर्भे विभाग कार्यालयामार्फत तोडक मोहिमेचे आयोजन करुन अनधिकृत बांधकाम निष्कासित करण्यात आले. या धडक मोहिमेसाठी तुर्भे विभागाकडील अधिकारी / कर्मचारी, नवी मुंबई महानगरपालिका 30 मजुर, 02 पोकलन, 01 टोंईंग व्हॅन, 06 घन, 12 हातोडे, तसेच अतिक्रमण विभागाकडील पोलीस पथक तैनात होते.
यापुढे देखील अशा प्रकारे अतिक्रमण विरोधी कारवाई तीव्र करण्यात येणार आहे.
