कोविड-19 अनुरूप वर्तनाविषयी जिल्हाधिकारी डॉ.महेंद्र कल्याणकर यांनी सुधारित आदेश केले जारी
*अलिबाग,जि.रायगड,दि.30, (जिमाका):-* जिल्हाधिकारी तथा जिल्हा दंडाधिकारी तथा आपत्ती व्यवस्थापन प्राधिकरण, रायगड डॉ.महेंद्र कल्याणकर यांनी साथरोग अधिनियम, 1897 आपत्ती व्यवस्थापन अधिनियम, 2005 व महाराष्ट्र कोविड-19 उपाययोजना नियम, 2020 अन्वये प्राप्त अधिकारातून रायगड जिल्ह्याच्या हद्दीतील सर्व आर्थिक, सांस्कृतिक, सामाजिक, क्रीडा व मनोरंजनविषयक क्षेत्रातील कार्यांना कोविड-19 सार्वत्रिक साथरोग येण्यापूर्वी, विविध स्थानिक किंवा इतर सक्षम प्राधिकरणांनी ठरविलेल्या सर्वसाधारण वेळानुसार, पुढील शर्तींच्या अधीन राहून, खुले करण्याचे आदेश जारी केले आहेत.
*1. कोविड अनुरूप वर्तनाचे (Covid Appropriate Behaviour) पालन:*
राज्य शासनाने व केंद्र सरकारने वेळोवेळी निर्धारित केलेल्या कोविड अनुरूप वर्तनाचे (CAB) सेवा प्रदाते परिवास्तूंचे (जागांचे) मालक, परवानाधारक, आयोजक इत्यादींसह सर्वांनी तसेच सर्व अभ्यागत, सेवा घेणारे, ग्राहक, अतिथी, इत्यादींनी काटेकोर पालन केले पाहिजे. कोविड अनुरूप वर्तनाची तपशीलवार मार्गदर्शक तत्वे तसेच त्याचे उल्लंघन केल्यास करावयाचे दंड कोविड अनुरूप वर्तनाच्या मार्गदर्शक तत्वांनुसार आणि यात यापुढे नमूद केलेल्या दंडांनुसार असेल.
*2. संपूर्ण लसीकरणाची आवश्यकता:*
*अ.* तिकीट असलेल्या किंवा तिकीट नसलेल्या कोणत्याही कार्यक्रमाच्या समारंभाच्या किंवा प्रयोगाच्या आयोजनाशी संबंधित असलेल्या सर्व व्यक्ती तसेच सर्व सेवा प्रदाते व सहभागी होणाऱ्या व्यक्ती (जसे की, खेळाडू, अभिनेते, इत्यादी) अभ्यागत, पाहुणे ग्राहक यांचे यात यापुढे दिलेल्या व्याख्येनुसार संपूर्ण लसीकरण केलेले असावे. (संपूर्ण लसीकरण झालेली व्यक्ती याचा अर्थ- लसीच्या दोन्हीही मात्रा (डोस) घेतलेल्या आहेत आणि दुसरी मात्रा (डोस घेतल्यानंतर 14 दिवस झालेले आहेत अशी कोणतीही व्यक्ती, असा आहे किंवा ज्या व्यक्तीचे वैद्यकीय स्थिती अशी आहे की, ज्यामुळे त्याला किंवा तिला लस घेण्यास मुभा नाही आणि त्या व्यक्तोकडे तशा अर्थाचे मान्यताप्राप्त डॉक्टराकडोल प्रमाणपत्र आहे अशी कोणतीही व्यक्ती असा आहे; किंवा 18 वर्षांपेक्षा कमी वयाची व्यक्ती, असा आहे.
*ब.* जेथे जनतेतील कोणत्याही व्यक्तींना येण्याचा आणि सेवा घेण्याचा हक्क आहे असे कोणतेही दुकान आस्थापना, मॉल, समारंभ, संमेलन (मेळावे) इत्यादी ठिकाणी संपूर्ण लसीकरण झालेल्या व्यक्तोद्वारे व्यवस्थापन केले पाहिजे आणि अशा ठिकाणी येणारे सर्व अभ्यागत, ग्राहक पांचे संपूर्ण लसीकरण झालेले असावे.
*क.* सर्व सार्वजनिक परिवहन सेवांमध्ये संपूर्ण लसीकरण झालेल्या व्यक्तींनाच परवानगी असेल.
*ड.* राज्य शासनाने तयार केलेला युनिव्हर्सल पास https://epassmsdima.mahait.org किंवा Telegram- MahaGovUniversal Pass Bot) हा संपूर्ण लसीकरण झाल्याच्या स्थितीचा वेध पुरावा असेल अन्यथा, छायाचित्र असलेले वैध ओळख असलेले कोविन प्रमाणपत्र देखील त्यासाठी वैध पुरावा मानले जाईल. 18 वर्षांपेक्षा कमी वयाच्या नागरिकांसाठी इतर शासकीय संस्थेने किंवा शाळेने दिलेले छायाचित्र ओळखपत्र आणि वैद्यकीय कारणांमुळे ज्या व्यक्ती, लस येऊ शकत नाहीत त्या व्यक्तीसाठी प्रमाणित वैद्यकीय व्यावसायिकाकडील प्रमाणपत्र प्रवेशासाठी कागदोपत्री पुरावा म्हणून वापरता येईल.
*इ.* जेथे सर्वसामान्य जनतेतील कोणतीही व्यक्ती भेट देत नाही अशी कार्यालये व इतर आस्थापना तसेच खाजगी परिवहन सेवा यांच्यासाठी संपूर्ण लसीकरण झालेल्या व्यक्तींसाठी त्या खुल्या असण्याची शर्त नसली तरी, त्यांना देखील संपूर्ण लसीकरण करणे आवश्यक आहे.
*3. महाराष्ट्र राज्यात प्रवास:*
कोणत्याही आंतरराष्ट्रीय गंतव्यस्थानावरून राज्यात येणाऱ्या सर्व प्रवाशाचे याबाबतीतील भारत सरकारच्या निर्देशाद्वारे विनियमन करण्यात येईल. राज्यात येणाऱ्या सर्व देशांतर्गत प्रवाशांचे यापुढे संपूर्ण लसीकरण केले जाईल किंवा 75 तासांसाठी वैध असलेले आरटीपीसीआर चाचणी प्रमाणपत्र ते बाळगतील.
*4. कोणताही कार्यक्रम/समारंभ इत्यादीमधील उपस्थितीवरील निर्बंध:*
*अ.* चित्रपटगृह, नाटयगृह, मंगलकार्यालय, सभागृह, इत्यादी बंदिस्त/बंद जागेत घेण्यात येणाऱ्या कोणत्याही कार्यक्रमाच्या/समारंभाच्या / उपक्रमाच्या बाबतीत जागेच्या क्षमतेच्या 50 टक्के लोकांना परवानगी दिली जाईल.
*ब.* संपूर्ण खुल्या असलेल्या (open to sky) जागांच्या बाबतीत कोणत्याही समारंभासाठी किंवा संमेलनासाठी तेथील जागेच्या क्षमतेच्या 25 टक्के लोकांना परवानगी दिली जाईल. संमेलनाच्या किंवा समारंभाच्या अशा ठिकाणांच्या बाबतीतील क्षमता औपचारिकपणे आधीच निश्चित केलेली नसेल तर (स्टेडियम प्रमाणे), संबंधित जिल्हा आपत्ती व्यवस्थापन प्राधिकरणास अशी क्षमता ठरविण्याचा अधिकार असेल.
*क.* जर वरील नियमांनुसार कोणत्याही संमेलनासाठी (मेळाव्यासाठी उपस्थित असलेल्या एकूण लोकांची संख्या हजारापेक्षा अधिक असेल तर, अशा बाबतीत स्थानिक आपत्ती व्यवस्थापन प्राधिकरणाला त्यांची माहिती द्यावी लागेल आणि स्थानिक आपत्ती व्यवस्थापन प्राधिकरण, अशा कोणत्याही संमेलनाचे (मेळाव्याचे निरीक्षक म्हणून पर्यवेक्षण करण्यासाठी त्याचे प्रतिनिधी पाठवील आणि तेथे वर नमूद केलेल्या नियमांचे काटेकोरपणे अनुपालन केले जात असल्याची खात्री करतील. कोविड-19 च्या प्रसाराचा धोका लक्षात घेवून कोविड अनुरूप वर्तनाचे उल्लंघन होत असल्याचे दिसून आले तर जिल्हा आपत्ती व्यवस्थापन प्राधिकरणाच्या संबंधित प्रतिनिधीला कार्यक्रम पूर्णतः किंवा अंशतः बंद करण्याचे आदेश देण्याचा अधिकार असेल.
*5. जिल्हा आपत्ती व्यवस्थापन प्राधिकरणाचे इतर वाजवी निर्बंध:*
कोणत्याही जिल्हा आपत्ती व्यवस्थापन प्राधिकरणास जर योग्य वाटल्यास कोणत्याही क्षणी त्याच्या संबंधित अधिकार क्षेत्रासाठी नमूद केलेले निर्बंध व शर्ती वाढविता येतील, परंतु कमी करता येऊ शकणार नाहीत. मात्र जाहीर नोटीसीद्वारे 48 तासांची पूर्वसूचना दिल्याशिवाय तसे करता येणार नाही. या आदेशाच्या दिनांकास अंमलात असलले जिल्हा आपत्ती व्यवस्थापन प्राधिकरणाने लादलेले कोणतेही निर्बंध जर ते पुढे चालू ठेवण्यासाठी जाहीर नोटीस देऊन पुन्हा जारी केले नसतील तर ते 48 तासानंतर अंमलात आणण्याचे बंद होतील.
*6. कोविड अनुरुप वर्तनविषयक नियम व दंड व्याख्या:*
कोविड-19 विषाणूचा प्रसार होण्यास प्रतिबंध करण्यासाठी आणि त्यामुळे त्याच्या प्रसाराचा साखळी खंडित करण्यासाठी प्रत्येक व्यक्तीने व संस्थेने पालन करण्याची गरज असलेले दैनंदिन सामान्य वर्तन अशी कोविड अनुरूप वर्तन (CAB) या संज्ञेची व्याख्या करता येऊ शकेल. ज्यांचे कोविड अनुरूप वर्तन (CAB) म्हणून वर्णन केले जाते अशा वर्तनाच्या पैलूंमध्ये खाली नमूद केलेल्या वर्तनाचा समावेश होतो आणि कोविड-19 विषाणूचा प्रसार होण्यास जे अडथळा निर्माण करू शकतील, अशा सर्व तर्कसंगत पैलूंचा देखील समावेश होतो. त्यात नमूद केलेली त्यांच्या प्रसाराची कार्यपद्धती (methodology) दिलेली आहे.
मूलभूत कोविड अनुरूप वर्तनाचे काही पैलू पुढीलप्रमाणे असून त्याचे प्रत्येकाने सदैव पालन केले पाहिजे. सर्व संस्थांनी हे सुनिश्चित करणे आवश्यक आहे की, त्यांचे सर्व कर्मचारी, त्यांच्या परिसरात भेट देणारे अभ्यागत, ग्राहक किंवा संस्थेच्या कोणत्याही कार्यक्रमात प्रत्यक्ष किंवा अप्रत्यक्षपणे सहभागी होणारी कोणतीही व्यक्ती त्याचे पालन करतील आणि त्यांच्या परिसरामध्ये आणि / किंवा व्यवसायाशी संबंधित व्यवहार करताना किया संबंधित संस्थेशी संबंधित असलेली अन्य कार्य करताना त्याची अंमलबजावणी करण्याकरिता संस्था उत्तरदायी असतील. संस्था त्यांच्या नियंत्रणाखाली किंवा जेथे ती संस्था आपला व्यवहार किंवा इतर कार्य करीत असेल, अशा सर्व ठिकाणी अशा सर्व कर्मचाऱ्यांना कोविड अनुरूप वर्तनाचे पालन करण्यासाठी आवश्यक असलेल्या हॅन्ड सॅनिटायझर, साबण व पाणी, तापमापक (thermal scanner), इत्यादी गोष्टी उपलब्ध करण्यासाठी देखील जबाबदार आहेत.
* नेहमी योग्य पद्धतीने मास्क परिधान करा. नाक व तोंड नेहमी मास्कने झाकलेले असले पाहिजे. (रूमालाला मास्क समजले जाणार नाही आणि मास्क म्हणून रूमाल वापरणारा व्यक्ती दंडास पात्र असेल.
* जेथे शक्य असेल तेथे नेहमी सामाजिक अंतर (6 फूट अंतर) राखा.
* साबणाने किंवा सॅनिटायझरने वारंवार व स्वच्छपणे हात स्वच्छ धुवा,
* साबणाने हात न धुता किंवा सॅनिटायझर न वापरता, नाक / डोळे / तोंड यांना स्पर्श करणे टाळा.
* योग्य श्वसन स्वच्छता (आरोग्य) राखा.
* पृष्ठभाग नियमितपणे आणि वारंवार स्वच्छ व निर्जंतुक करा.
* खोकताना किंवा शिंकताना, टिश्यू पेपरचा वापर करून तोंड व नाक झाका आणि वापरलेले टिश्यू पेपर नष्ट करा. जर एखाद्याकडे टिश्यू पेपर नसेल तर त्याने स्वतःचा हात नव्हे तर, हाताचा वाकवलेला कोपर नाका-तोडांवर ठेवून खोकावे व शिंकावे.
* सार्वजनिक ठिकाणी थुंकू नका.
* सार्वजनिक ठिकाणी गर्दी टाळा आणि सुरक्षित अंतर (6 फूट अंतर) राखा.
* कोणालाही शारिरीक स्पर्श न करता, नमस्कार / अभिवादन करा
* कोविड-19 विषाणूचा प्रसार टाळण्यासाठी आवश्यक असलेले अन्य कोणतेहो तर्कसंगत वर्तन.
*दंडात्मक कारवाईचे स्वरूप:*
* वरील सूचना/ नियमांनुसार अपेक्षित असलेल्या कोविड अनुरूप वर्तनाचे पालन न करणाऱ्या कोणत्याही व्यक्तीला कसूर केल्याच्या प्रत्येक प्रसंगी रुपये 500/- इतका दंड करण्यात येईल.
* ज्यांनी आपले अभ्यागत, ग्राहक, इत्यादींवर कोविड अनूरुप वर्तन लादणे अपेक्षित आहे, अशा संस्थेच्या किंवा आस्थापनेच्या कोणत्याही जागेत जर एखाद्या व्यक्तीने कसूर केल्याचे दिसून आले तर, त्या व्यक्तीवर दंड लादण्याव्यतिरिक्त, अशा संस्थांना किंवा आस्थापनांना सुध्दा रुपये 10,000/ इतका दंड करण्यात येईल.
* जर कोणतीही संस्था किंवा आस्थापना तिचे अभ्यागत, ग्राहक, इत्यादीमध्ये कोविड अनुरूप वर्तनविषयक शिस्त निर्माण करण्यात नियमितपणे कसूर करीत असल्याचे दिसून आले तर एक आपत्ती म्हणून कोविड-19 ची अधिसूचना अंमलात असेपर्यंत अशा संस्था किंवा आस्थापना बंद करण्यात येईल.
* जर एखाद्या संस्थेने किंवा आस्थापनेने स्वतःच कोविड अनुरूप वर्तनाचे (CAB) किंवा प्रमाण कार्यचालन कार्यपद्धतीचे (SOP) पालन करण्यात कसूर केली तर ती प्रत्येक प्रसंगी रूपये 50,000/ इतक्या दंडास पात्र असेल.
* वारंवार कसूर केल्यास, एक आपत्ती म्हणून कोविड-19 ची अधिसूचना अंमलात असेपर्यंत ती संस्था किंवा आस्थापना बंद करण्यात येईल.
या आदेशाचे/सूचनांचे उल्लंघन करणारी व्यक्ती/आस्थापना दंडात्मक कारवाईस तसेच भारतीय दंड विधान संहिता कलम 188, 269, 270, 271 तसेच आपत्ती व्यवस्थापन कायदा 2005 च्या कलम 51 सह अन्य तरतूदींनुसार फौजदारी शिक्षेस पात्र राहतील, असे जिल्हाधिकारी तथा जिल्हा दंडाधिकारी तथा आपत्ती व्यवस्थापन प्राधिकरण, अध्यक्ष डॉ.महेंद्र कल्याणकर यांनी कळविले आहे.
