सायन पनवेल महामार्गावर धावत्या बसला लागली आग

नवीन पनवेल,मयूर तांबडे (पत्रकार): सायन पनवेल महामार्गावर खारघर येथील कोपरा पुलाजवळ एका टूर्स अँड ट्रॅव्हल्स बसला मध्यरात्री बारा वाजण्याच्या सुमारास अचानक आग लागली. मात्र चालकाने प्रसंगावधान दाखवत बस थांबवून प्रवाशांना बाहेर काढल्याने जीवितहानी टळली. अग्नीशमन विभागाने बसला लागलेल्या आगीवर नियंत्रण मिळवले आहे.

बुधवारी १५ फेब्रुवारी रोजी मध्यरात्री बारा वाजण्याच्या सुमारास मुंबई वरून सांगोला-सातारा जाणार्या एका टूर्स अँड ट्रॅव्हल्स बसला अचानक आग लागली. या बसमध्ये एकूण १७ प्रवासी होते. बस सायन पनवेल महामार्ग कोपरा पुलावरून जात असातना अचानक इंजिन मधून ठिणग्या पडू लागल्या. बसचालकाने प्रसंगावधान दाखवून बस थांबवली आणि प्रवाशांना आपत्कालीन दरवाजा मधून बाहेर जायला सांगितले. इतक्यात बसने पेट घेतला. मात्र तोपर्यंत प्रवासी बसमधून उतल्याने कुठलीही जिवीतहानी झाली नाही. या आगीत बस पुर्णपणे जळून खाक झाली. अग्निशमन दलाच्या जवानांनी आगीवर नियंत्रण मिळवून आग विझवली आहे. आग नेमकी कशामुळे लागली ते स्षष्ट झालेले नाही.