माथाडी भवन येथे महाराष्ट्र राज्य माथाडी, ट्रान्सपोर्ट आणि जनरल कामगार यूनियन तर्फे मुकादम कार्यकर्त यांची संयुक्त बैठक संपन्न
नवी मुंबई, दि. २५- माथाडी कामगारांच्या प्रलंबित मागण्यांकडे शासनाने त्वरीत लक्ष घालावे व त्यांची सोडवणुक करावी यासाठी आज दि. २५ जानेवारी २०२३ रोजी माथाडी भवन येथे महाराष्ट्र राज्य माथाडी, ट्रान्सपोर्ट आणि जनरल कामगार यूनियन तर्फे मुकादम कार्यकर्त यांची संयुक्त बैठक आयोजित करण्यात आली होती. या सभेत बोलताना युनियनचे सरचिटणीस नरेंद्र पाटील म्हणाले की, आम्ही अनेकवेळा माथाडी कामगारांच्या प्रलंबित समस्यांकडे सरकारचे लक्ष वेधण्यासाठी मोर्चे, आंदोलन केली तसेच शासनाच्या विविध खात्यांकडे आणि मंत्री महोदयांकडे पाठपुरावाही केला मात्र सरकार माथाडी कामगारांच्या समस्यांकडे दुर्लक्ष करीत आहेत, म्हणूनच आता जर का सरकारने माथाडींच्या समस्या तत्परतेने सोडविण्यासाठी कार्यवाही केली नाही तर येत्या १ फेब्रुवारी रोजी एक दिवसाचा लाक्षणिक संप पुकारणारचं असा निर्वाणीचा इशारा महाराष्ट्र राज्य माथाडी, ट्रान्सपोर्ट आणि जनरल कामगार युनियनचे नेते नरेंद्र अण्णासाहेब पाटील यांनी दिला. माथाडी कामगारांच्या समस्यांकडे सरकारने दुर्लक्ष केल्यामुळे त्यांच्यामध्ये असंतोष पसरला असून, यामुळे तमाम माथाडी कामगार लाक्षणिक संप पुकारण्यासाठी सज्ज झाले आहेत. तसा निर्णय बैठकीत विविध टोळ्यांचे मुकादम, उपमुकादम, कार्यकर्त्याचा संमतीने सभेत घेण्यात आला.
माथाडी कामगारांच्या समस्यांमध्ये माचाही सल्लागार समितीची पुर्नरचना करणे पुर्नरचित सल्लागार समितीवर कामगार संघटनांच्या प्रतिनिधींची सदस्य म्हणून नेमणुक करणे, सुरक्षा रक्षक कामगार सल्लागार समितीची पुर्नरचना करणे, विविध माथाडी मंडळाच्या पुनर्रचना करुन पुर्नरचित माथाडी मंडळांवर युनियनच्या सभासद संख्येच्या प्रमाणात सदस्यांच्या नेमणूका करणे, माथाडी मंडळाच्या कार्यालयीन सेवेत माथाडी कामगारांच्या मुलांना प्राधान्य देणे, अनुज्ञाप्ती धारक तोलणार/मापाडी कामगारांना बाजार समितीच्या कार्यालयीन सेवेत घेणे माथाडी कामगारांच्या हक्काच्या कामात अडथळा आणून कामगारांवर दहशत करणाऱ्या गुंड प्रवृत्तीच्या व्यक्तींना आळा घालण्यासाठी गृह खात्याने संबंधितांची समिती गठीत करावी व पोलीस संरक्षणाचे नवीन परिपत्रक पोलीस यंत्रणेकडून त्वरीत काढावे, अशा विविध मागण्यांबाबत संघटनेने सतत पाठपुरवा केला. सरकारने मात्र नेहमीच दुर्लक्ष केले आहे. म्हणूनच माथाडी कामगारांच्या कामगार,गृह, पणन व सहकार आणि संबंधित खात्याअंतर्गत असलेल्या प्रश्नांची सोडवणूक करण्याकडे शासनाचे लक्ष वेधण्यासाठी माथाडी कामगार लाक्षणिक संप करतील असा इशारा नरेंद्र अण्णासाहेब पाटील यांनी या सभेत बोलताना दिला.
या सभेत युनियनचे कार्याध्यक्ष गुलाबराव जगताप तसेच जितेंद्र येवले, पोपटराव धोंडे, सुरज बर्गे, पांडुरंग धोंडे, संतोष अहिरे, अजय इंगुळकर, नाशिकचे पोटे, संभाजीराव जाधव यांची भाषणे झाली. सभेला युनियनचे इतर सर्व पदाधिकारी उपस्थितीत होते.
