कामगार मोर्चाच्यावतीने 'धन्यवाद मोदीजी अभियान'
पनवेल(प्रतिनिधी) कामगार मोर्चाच्यावतीने 'धन्यवाद मोदीजी अभियान' राबवुन पहिल्या टप्प्यात महाराष्ट्रातील १४ जिल्हयाचा ८ दिवस प्रवास यात्रेचा पहिला टप्पा रायगड जिल्ह्यातील पनवेल येथील भाजपच्या मध्यवर्ती कार्यालयात भाजप कामगार मोर्चाचे प्रदेशाध्यक्ष गणेश ताठे यांच्या प्रमुख उपस्थितीत पार पडला. यावेळी लाभार्थी व पदाधिकाऱ्यांची बैठक संपन्न झाली.
देशाचे लोकप्रिय पंतप्रधान नरेंद्र मोदी यांनी युवा, महिला, कामगार, शेतकरी, यांच्यासाठी राबविलेल्या शेकडो कल्याणकारी योजनांमुळे करोडो देशवासीयांच्या जीवनात आमुलाग्र बदल झाला. या कल्याणकारी योजनांची माहिती सर्वांना देणे व त्या माध्यमातून मादीजींना धन्यवाद देणे, यासाठी भा. ज.पा. कामगार मोर्चा महाराष्ट्र प्रदेशातर्फे प्रदेश अध्यक्ष गणेश ताठे यांनी हे अभियान चालविले आहे. १४ जिल्ह्यात प्रवास करून हि यात्रा काल रायगडमध्ये आली.
रविवारी सायंकाळी पळस्पा फाटा येथे कामगार मोर्चाचे रायगड जिल्हा अध्यक्ष जितेंद्र घरत यांनी शेकडो कार्यकर्ते व कामगारांसमवेत गणेश ताठे व प्रदेश पदाधिकारी यांचे जोरदार स्वागत केले. त्यानंतर पनवेल येथील छत्रपती शिवाजी महाराज पुर्णाकृती पुतळ्यास पुष्पहार अर्पण करून महाराजांना अभिवादन करण्यात आले. तद्नंतर मिरवणुकीने पनवेल मधील भा.ज.पा. मध्यवर्ती कार्यालयात जाऊन तेथे सभा घेण्यात आली.कामगार नेते जितेंद्र घरत यांनी आपल्या स्वागतपर भाषणात जिल्हयातील कामाचा आढावा घेताना योजना जिल्हयात कशाप्रकारे राबविण्यात आल्या यांची माहिती देऊन जिल्ह्यातील कामगारांचे प्रश्न मान्यवरांपुढे मांडले.
गणेश ताठे यांनी आपल्या भाषणात, मोदीजींनी राबविलेल्या योजनांची माहिती देऊन कामगार कायदे व त्यामुळे होणारा कामगारांचा फायदा यांची माहिती देऊन कामगारांच्या कोणत्याही प्रश्नाला न्याय आम्ही देवू असे अभिवचन त्यांनी दिले. या कार्यक्रमात गणेश ताठे यांनी जितेंद्र घरत यांना महाराष्ट्र प्रदेश कार्यकारीणीत चिटणीस पदी घेत असल्याचे व कोकण विभागाची जबाबदारी देण्यात येत असल्याचे घोषित केले. बहारदार व जोशपूर्ण झालेल्या या कार्यक्रमाचे सूत्रसंचालन रायगडचे सरचिटणीस ज्ञानेश्वर साखरे यांनी केले तर आभार प्रदर्शन रविंद्र कोरडे यांनी केले. या दौ-यात प्रदेश कार्यकारीणीतील प्रदेश सरचिटणीस प्रमोद जाधव, हनुमंत लांडगे प्रदेश उपाध्यक्ष चंद्रकांत महाडीक विनोद शहा, प्रदेश सदस्य मंगेश चव्हाण सदस्य उपस्थित होते.
याशिवाय जिल्ह्यातील पदाधिकारी समिरा चव्हाण, चित्रपट कामगार आघाडी रायगड जिल्हा अध्यक्षा नेत्रा राणे, उपाध्यक्ष अरुण घोडके, चिटणीस जगदीश म्हात्रे, संतोष घरत, अल्ताफ शेख, रविंद्र पाटील, अनिल कर्णूक, चंद्रकांत कडू, पंढरीनाथ दरेकर, तसेच तळोजा एम.आय.डी.सी. मधील डाऊ केमिकल, हायकल लिमिटेड कंपनी, बाल्मर लॉरी, केमस्केप केमिकल, खोपोली येथील हर्क्युलस होईस्ट, पाताळगंगा मधील इदेमित्स्यु ल्युब इंडिया, आष्टे लॉजिस्टिक, गती के. डब्ल्यू ई, उरण मधील आ.वॊ. टी. एल. आदी कंपनीमधील कामगार मोठ्या संख्येने उपस्थित होते.
