पनवेलमध्ये पुन्हा हातगाडयांचे बस्तान
नवीन पनवेल : पनवेल उरणनाका ते टपालनाका येथे दररोज 20 ते 25 अनधिकृत हातगाड्या लागत आहेत. यामुळे नित्याच्या वाहतूक कोंडीला सामोरे जावे लागत आहे. त्याचा नागरिकांना त्रास होत आहे. पुन्हा एकदा शहरात हातगाड्या सुरु झाल्याचे चित्र दिसत आहे. मात्र महापालिकेचे अतिक्रमण विभाग याकडे बघूनही कारवाई का करत नाही असा सवाल उपस्थित झाला आहे.
पनवेल शहरात ठिकठिकानी हातगाडी चालकानी बस्तान बसविण्यास सुरुवात केली आहे. पनवेल शहराची प्रमुख बाजारपेठ समजल्या जाणाऱ्या टपाल नाका येथून उरण नाक्यापर्यंत फळे आणि भाज्या विक्री करणाऱ्या हातगाड्या उभ्या असतात. या गाड्या पुढे उरण नाक्यावर प्रचंड गर्दी करतात. येथेच मच्छी विक्रेते रस्त्यावर बसलेले असतात. रिक्षा थांबा देखील येथेच असल्याने नागरिकांच्या गाड्या रस्त्याच्या दुतर्फा हॉस्पिटलपर्यंत लागलेल्या असतात. त्यामुळे शहरातील या मुख्य रस्त्यावर वाहतूक कोंडी कायम असते. त्यामुळे पुन्हा एकदा पनवेल परिसर बेकायदा हातगाड्याच्या विळख्यात सापडलेला दिसत आहे. रस्त्यावर पुन्हा एकदा हातगाड्या सुरु झाल्या आहेत. मात्र अतिक्रमण विरोधी पथक यांच्यावर कारवाई करताना दिसत नसल्याने त्यांचे प्रमाण वाढू लागले आहे. पनवेल महापालिकेची अतिक्रमण विरोधी मोहीम सुस्त झाली असल्याचे या निमित्ताने दिसत आहे. हातगाड्यांचे शहर ही पुसलेली ओळख पुन्हा पनवेल शहरात डोके वर काढू लागली आहे.
