हळदी- कुंकवासाठी विधवा महिलांनाही दिला मान-कॉलनी फोरमचे समन्वयक मधु पाटील यांचा स्तुत्य उपक्रम
*कपाळी कुंकू लागताच डोळ्यात तरळले पाणी...*
*गानसम्राज्ञी लता मंगेशकर यांना वाहण्यात आली श्रद्धांजली*
खारघर ( प्रतिनिधी ) : हळदी- कुंकवाच्या कार्यक्रमात सुवासिनींनाच मान देण्याची प्रथा आहे़ परंतु, खारघर येथील कॉलनी फोरम चे समनव्यक मधु पाटील संकल्पनेतून "विधवा नव्हे 'स्त्री' मी " हा अनोखा उपक्रम राबविण्यात आला. हळदी- कुंकू कार्यक्रमास विधवा महिलांनाही मान देत नवा पायंडा घालण्याबरोबर सामाजिक परिवर्तनाचा नवा अध्याय सुरु केला. यावेळी कॉलनी फोरमचे अध्यक्षा लीना गरड, समन्वयक अनिता ताई भोसले प्रमुख पाहुणे म्हणून उपस्थित होते. पतीच्या निधनानंतर महिलेला कुंकू लावण्यास बंदी घालणं कितपत योग्य आहे. दुखा:चा डोंगर डोक्यावर कोसळलेल्या असतानाही शेती, उद्योगधंदे, घरं चालवणे, मुलांचं शिक्षण या सर्व जबाबदाऱ्या महिला आपलं कर्तव्य समजून पार पाडतात. तरीही अशा महिलांना समाजात सापत्न वागणूक का? म्हणूनच आम्ही "विधवा नव्हे 'स्त्री' मी " हा उपक्रम राबवला असल्याचे कॉलनी फोरमचे समनव्यक आणि क्रेडाई एम सी एच आय चे रायगड जिल्हा अध्यक्ष मधु पाटील यांनी सांगितले.
*कपाळी कुंकू लागताच डोळ्यात तरळले पाणी*
कुंकवाचा धनी परलोकवासी झाल्यानंतर घरीदारी उपेक्षेची नजर वाट्याला आलेल्या महिलांच्या कपाळी हळदी-कुंकवाची बोटं लागली आणि त्यांच्या डोळ्यात पाणी तरळले...एकमेकींना आलिंगन देऊन निःशब्द भावना नजरेतून व्यक्त झाल्या... विधवा महिलांसाठीच्या हळदी-कुंकू समारंभाचे भावनिक दृश्य यावेळी पाहायला मिळाला. वैधव्य आलेल्या 15 महिलांना यावेळी हळदी कुंकू लावत त्यांना विशेष भेट देत पुष्पगुच्छ देऊन सन्मानित करण्यात आले. यावेळी महिलांची मोठी उपस्थिती पाहायला मिळाली. महिलांसाठी विविध खेळाचे आयोजन करण्यात आले होते. आणि पहिला क्रमांक कोण पटकावते यासाठी चांगलीच चढाओढ पाहायला मिळाली. खारघर से 21 च्या चतुर्भुज सोसायटी मधील कॉलनी फोरमच्या जनसंपर्क कार्यालया समोर मोठ्या उत्साहात हा सोहळा पार पडला.
*गानसम्राज्ञी लता मंगेशकर यांना वाहण्यात आली श्रद्धांजली*
भारतरत्न आणि भारताच्या गानकोकिळा म्हणून प्रसिद्ध असलेल्या लता मंगेशकर यांचं निधन झालं आहे. वयाच्या ९२ वर्षी त्यांनी अखेरचा श्वास घेतला. हळदी कुंकू कार्यक्रमा दरम्यान लता दीदी यांच्या प्रतिमेला पुष्प अर्पण करत श्रद्धांजली वाहण्यात आली.
