बौद्धिक दिव्यांगजन संस्थेमध्ये क्ले आर्ट स्टुडिओचे उद्घाटन
नवी मुंबई/प्रतिनिधी,दि.१३-बौद्धिक दिव्यांग मुलांना देशाच्या मातीशी जोडण्याचा प्रयत्न म्हणून “प्रोजेक्ट सांझी माटी” या उपक्रमांतर्गत राष्ट्रीय बौद्धिक दिव्यांगजन सशक्तीकरण संस्था, प्रादेशिक केंद्र, नवी मुंबई येथे दिनांक 11ऑक्टोबर 2025 रोजी रोटरी क्लब सनराईज खारघर यांच्या सहकार्याने सी.एस.आर. उपक्रमांतर्गत “क्ले आर्ट स्टुडिओ”ची स्थापना करण्यात आली. हा प्रकल्प “वोकल फॉर लोकल” या संकल्पनेच्या माध्यमातून आत्मनिर्भर भारताच्या निर्मितीत दिव्यांगजनांचा सहभाग सुनिश्चित करण्याचा एक प्रयत्न आहे.
क्ले आर्ट स्टुडिओच्या उद्घाटन प्रसंगी श्री. हर्ष मोकल, जिल्हा राज्यपाल, रोटरी क्लब नवी मुंबई; श्री. अमरेंद्रकुमार शाह, अध्यक्ष, रोटरी क्लब सनराईज खारघर; श्री. निलेश मिश्रा, सचिव, रोटरी क्लब सनराईज खारघर आणि श्री. एम. प्रकाश, प्रकल्प व्यवस्थापक, रोटरी क्लब सनराईज खारघर उपस्थित होते.
या प्रसंगी कार्यक्रमाचे मुख्य अतिथी श्री. हर्ष मोकल यांनी रोटरी क्लब सनराईज खारघर तर्फे बौद्धिक दिव्यांगजनांसाठी प्रायोजित निरामया आरोग्य विमा योजनेच्या पावत्या वितरित केल्या तसेच भविष्यात संस्थेसोबत विविध उपक्रम राबविण्याचे आश्वासन दिले.
हा कार्यक्रम संस्थेचे प्रभारी अधिकारी डॉ रवी प्रकाश सिंह यांच्या मार्गदर्शनाखाली करण्यात आला. कार्यक्रमाचे समन्वयन श्रीमती कविता आर., पुनर्वसन अधिकारी, राष्ट्रीय बौद्धिक दिव्यांगजन सशक्तीकरण संस्था, प्रादेशिक केंद्र, नवी मुंबई यांनी केले.
