जैव वैद्यकिय कचऱ्याबाबत पनवेल महापालिकेची मुख्यालयात बैठक
पनवेल,दि.23: पनवेल महानगरपालिका क्षेत्रातील सर्व खाजगी रुग्णालये, दवाखाने, पॅथोलॉजी लॅब, डे केअर सेंटर येथील जैव वैद्यकिय कचऱ्याची विल्हेवाट लावणेकरीता मुंबई वेस्ट मॅनेजमेंट सर्व्हिस, लिमिटेड, तळोजा या कंपनीच्या वाढीव दर कमी करण्याबाबत व इतर तक्रारींचे निवारण करण्याबाबत रायगड मेडिकल असोशिएशनच्या सदस्यांची दिनांक 22ऑगस्ट रोजी महापालिकेच्या मुख्यालयात आमदार श्री.प्रशांत ठाकूर यांच्या प्रमुख उपस्थितीमध्ये आयुक्त महोदय श्री.मंगेश चितळे यांच्या अध्यक्षतेखाली बैठक घेण्यात आली.
यावेळी माजी सभागृह नेते श्री.परेश ठाकूर, उपायुक्त डॉ. वैभव विधाते, मुख्य वैद्यकिय अधिकारी डॉ. आनंद गोसावी, माजी नगरसेवक अनिल भगत ,नितीन पाटील, महापालिकेचे वैद्यकिय अधिकारी, महापालिका कार्यक्षेत्रातील वैद्यकिय क्षेत्रातील विविध संघटनांचे प्रतिनिधी, मुंबई वेस्ट मॅनेजमेंट सर्व्हिस, लिमिटेड, तळोजाचे प्रतिनिधी, महाराष्ट्र प्रदूषण नियंत्रण मंडळाचे प्रतिनिधी उपस्थित होते.
पनवेल महानगरपालिका क्षेत्रातील सर्व खाजगी रुग्णालये, दवाखाने, पॅथोलॉजी लॅब, डे केअर सेंटर येथे जैव वैद्यकिय कचऱ्याची विल्हेवाट लावणेकरीता मुंबई वेस्ट मॅनेजमेंट सर्व्हिस, लिमिटेड, तळोजा या खाजगी कंपनीस महाराष्ट्र प्रदूषण नियंत्रण मंडळाद्वारे प्राधिकृत केले आहे. परंतु जैव वैद्यकिय कचऱ्याची विल्हेवाट लावणेकरीता महापालिका कार्यक्षेत्रात ही एकमेव कंपनी असल्याकारणाने कंपनीचा कारभार मनमानी पद्धतीने चालु आहे, असे खाजगी रुग्णालये, दवाखाने, पॅथोलॉजी लॅब डे केअर सेंटर यांचे म्हणणे आहे. जैव वैद्यकिय कचऱ्याची योग्य व वेळेत विल्हेवाट लावणे परिसराच्या ,आरोग्यच्यादृष्टीने आवश्यक असल्यामुळे रायगड मेडिकल असोसिएशन यांनी पत्राद्वारे आमदार महोदय यांच्या प्रमुख उपस्थितीत व आयुक्त महोदयाच्या अध्यक्षतेखाली खाजगी रुग्णालय प्रतिनिधी व मुंबई वेस्ट मॅनेजमेंट सर्व्हिस, लिमिटेड, तळोजा यांचे प्रतिनिधी , महाराष्ट्र प्रदूषण नियंत्राण मंडळ यांची एकत्रित बैठक आयोजीत करणेबाबत मागणी केली होती त्यानुसार ही बैठक आयोजित करण्यात आली होती.
यावेळी आमदार श्री. प्रशांत ठाकूर यांनी पनवेल महानगरपालिकेस मा.जिल्हाधिकाऱ्यांच्या अध्यक्षतेखाली जैव वैद्यकिय कचरा अधिनियम 2016 अंतर्गत जिल्हास्तरीय गठित असलेल्या समितीस बैठक घेण्याकरिता मा. जिल्हाधिकारी यांना निवेदन पत्र देण्याबाबत सूचित केले.
आयुक्त श्री.मंगेश चितळे यांनी महाराष्ट्र प्रदूषण नियंत्रण मंडळास जैव वैद्यकिय कचऱ्याबाबतचे शासन निर्णय व नियमावली देण्याबाबत सूचित केले. मा.जिल्हाधिकारी यांच्या अध्यक्षतेखाली गठित असलेल्या समितीची सचिव या नात्यने लवकरात लवकर बैठक आयोजित करण्याबाबत सूचित केले.
यावेळी चर्चेदरम्यान ठाणे महानगरपालिकेच्या दरांप्रमाणे पनवेल महानगरपालिका कार्यक्षेत्रातील सर्व खाजगी रुग्णालये, दवाखाने, पॅथोलॉजी लॅब, डे केअर सेंटर्सना मुंबई वेस्ट मॅनेजमेंट सर्व्हिस, लिमिटेड कंपनीने दर आकारण्याबाबत स्वीकृती दर्शविली.